‘युद्ध युद्ध नै हुन्छ’ सुनेपछि मन्त्रीद्वारा अध्यक्षको प्रशंसा

कवि तथा नेपाल वायुसेवा निगमका कार्यकारी अध्यक्ष युवराज अधिकारीद्वारा लिखित ‘युद्ध युद्ध नै हुन्छ’ कविता संग्रह लोकार्पणमा मन्त्रीले उनको प्रशंसा गरेका छन् ।

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले अध्यक्ष अधिकारीको साहित्यिक योगदानको खुलेर चर्चा गरेका हुन् । अधिकारीका साहित्यिक रचनाले नेपाली समाजलाई सही दिशामा लैजान महत्वपूर्ण भूमिका खेल्ने विश्वास उनले व्यक्त गरेका छन् ।

‘यस कविताले समाजलाई सही दिशामा लैजान मद्दत पुर्याउनेछ । किनकि युद्ध घातक, विनाशकारी र गलत छ । युद्धले कसैलाई जिताउँदैन र समाजको हितमा पनि हुँदैन । कविता संग्रहले कसरी सकारात्मक बाटोमा हिँड्न सकिन्छ भन्ने उदाहरण दिएको छ’,मन्त्री पाण्डेले भने ।

मन्त्री पाण्डेको प्रमुख आतिथ्यमा आयोजित कार्यक्रममा कवि तुलसी दिवस, विश्वविमोहन श्रेष्ठ, चलचित्र निर्देशक प्रकाश सायमी र अधिकारीले संयुक्त रुपमा पुस्तक लोकार्पण गरेका हुन् । समारोहलाई सम्बोधन गर्दै चलचित्रकर्मी सायमीले अधिकारीको कविता तुलनात्मक रुपमा सरल भएको बताए ।

अधिकारीको साहित्यिक योगदानको तारिफ गर्दै उनले सुनाए,‘यति मिठो कविता पढ्न पाएको ४० वर्ष पछाडि हो । उहाँको कविता पूर्वको आञ्चलिकता र सरल खालको छ ।’ कवि अधिकारीले जीवनको भोगाइका उतारचढावको अनुभव कवितामा समेटेको बताए ।

साहित्यले भुइँ टेकेको हुनुपर्ने उल्लेख गर्दै आफ्नो जन्मथलो इलामले कविता लेखनमा प्रेरित गरेको लेखक अधिकारीको भनाइ छ । ‘समाजमा देखेको र भोगेको कुरा लेखेको हुँ । मेरो जन्मथलो इलामले मलाई लेखनमा प्रेरित गर्यो । साहित्य, कला, जीवन सापेक्ष हुनुपर्छ’,उनले भने,‘सरलता हुनुपर्छ । साहित्यले भुइँ टेकेको हुनुपर्छ । समग्रमा मानव जीवनलाई समेटेको हुनुपर्छ ।’

उनको यो दोस्रो कविता संग्रह हो । लोकार्पण कार्यक्रममा सांसद अमरेशकुमार सिंह, नेकपा एमालेका नेता महेश बस्नेत, पूर्वमुख्यसचिव भोजराज घिमिरेलगायतको उपस्थिति थियो । क्याप्टेन विजय लामा र अभिनेता निखिल उप्रेतीले अधिकारीको उक्त रचना वाचन गरेका थिए ।

धेरै अघिदेखि कविता लेख्दै आएका अधिकारी गीत लेखनमा पनि उत्तिकै सक्रिय छन् । उनको ‘मेरा चित्कारहरु’ नामक कविता संग्रह र ‘देउरालीको फूल’ गीत बजारमा आइसकेको छ ।