ताप्लेजुङ गोल्डकपमा साहारा पोखरा बाहिरियो, रेडस्टार झापाको अग्रता

अन्तर्राष्ट्रिय आमन्त्रण तेस्रो ताप्लेजुङ गोल्डकप फुटबल प्रतियोगितामा झापाको रेडस्टार फुटबल क्लबले साहारा क्लब पोखरालाई २–० गोल अन्तरले पराजित गरेको छ । आजको खेलको पहिलो हाफ गोलरहित बराबरीमा टुंगिएपनि, दोस्रो हाफको सुरुवातमै रेडस्टारले दुई गोल गर्दै जित पक्का गरेको हो ।

साहाराका खेलाडीले गोल फर्काउने धेरै प्रयास गरे पनि सफल हुन सकेनन् । स्थानीय मैदानमा राम्रो लयमा देखिएको रेडस्टारसँगको हारसँगै साहारा प्रतियोगिताबाट बाहिरिएको छ । लाखेजात्राको अवसरमा आयोजित प्रतियोगिताको फाइनल खेल साउन ३१ गते शनिबार हुने छ।

प्रतियोगिताको उपाधि विजेताले सात लाख दुई हजार ८२ रुपैयाँ नगद पुरस्कारसहित ट्रफी, पदक र प्रमाणपत्र प्राप्त गर्नेछन् । उपविजेताले तीन लाख पचास हजार ८२ रुपैयाँ नगद पाउनेछन् । आयोजक समितिका अध्यक्ष सागर मादेनका अनुसार प्रतियोगिताका उत्कृष्ट खेलाडीलाई १५० सिसी क्षमताको यामाहा मोटरसाइकल प्रदान गरिनेछ ।