ऐन महरविरुद्ध पक्राउ पुर्जी जारी गर्न माग

नेकपा एमालेका केन्द्रीय सदस्य ऐन महरविरुद्ध फेरि पक्राउ पुर्जी जारी गर्न माग गर्दै काठमाडौँ जिल्ला अदालतमा मुद्दा परेको छ । 

महरले विद्युतीय कारोबार ऐन ०६३ को दफा ४७ को उपदफा (१) बमोजिमको कसुर गरेको दावी गर्दै जिल्ला सरकारी वकिलको कार्यालयले मुद्दा दर्ता गरेको हो । 

अनेरास्ववियुका पूर्वअध्यक्ष महर र उनकी श्रीमतीले सामाजिक सञ्जालमार्फत् गाली बेइज्जती तथा चरित्रहत्या गरेको भन्दै बझाङकी रश्मिला धामीले हुलाकमार्फत् प्रहरीको साइबर ब्युरोमा जाहेरी दिएकी थिइन् । त्यसमा जिल्ला अदालतले पक्राउ पुर्जी जारी गरेपछि भदौ ११ आफैँ ब्युरोमा उपस्थित भएका महर दम्पतीलाई जिल्ला सरकारी वकिलको कार्यालयले बयान लिएर हाजिर जमानीमा छाडेको थियो ।

तर, आज प्रहरी अनुसन्धानको क्रममा महरले विद्युतीय कसुर गरेको ठहरिएको दावी गर्दै अदालतमा मुद्दा दर्ता भएको हो । अभियोग पत्रमा विद्युतीय कारोबार ऐन ०६३ को दफा ४७ बमोजिमको सजाय मागदावी गर्दै पक्राउ पुर्जी जारी गर्न भनिएको छ  ।

‘अनुपस्थित प्रतिवादी ऐन महर भन्ने ऐनबहादुर महरको हकमा मुलुकी फौजदारी कार्यविधि संहिता ०७४ को दफा ५७ बमोजिम पक्राउ पुर्जी जारी गरी पाउँ’, अभियोग पत्रमा उल्लेख छ ।