एमाले नेताविरुद्ध अपहरण प्रयास र धन असुलीको उजुरी

नेकपा (एमाले) निकट युवा सङ्घ नेपालका एक केन्द्रीय सदस्यले सर्वसाधारणलाई भयत्रास देखाएर अपहरण प्रयास र धन असुली गर्न खोजेको आरोपमा प्रहरीमा उजुरी परेको छ।

सिन्धुपाल्चोक जिल्ला बाह्रबिसे स्थायी निवासी तथा युवा सङ्घका केन्द्रीय सदस्य जगत लामाले आफूलाई कुटपिट गर्दै ज्यान नै मार्ने धम्की दिएर स्कोरपियो गाडी लुटेको आरोपमा गोकर्णेश्वर–६ मनहरा बस्ने छिरिङ्ग लामा शेर्पाले जिल्ला प्रहरी कार्यालयमा उजुरी दिएका हुन् ।

 उजुरीअनुसार जगत लामासहित पाँच जनाको समूहले शेर्पालाई नियन्त्रणमा लिएर गाडी खोसेको,रकम असुली गर्ने उद्देश्यले त्रास दिएको र हत्या गर्ने धम्की समेत दिएको उल्लेख छ ।

शेर्पाले सुरक्षाको मागसहित जिल्ला प्रशासन कार्यालयमा गुहार मागेपछि प्रशासनले उक्त उजुरी जिल्ला प्रहरी कार्यालयलाई कारबाहीका लागि फिर्ता पठाएको बताइन्छ ।

जगत लामा युवा सङ्घका अध्यक्ष क्षितिज थेवे र एमाले सचिव महेश बस्नेत नजिकका व्यक्ति मानिन्छन् ।  उनलाई केन्द्रीय कमिटीमा मनोनयन गर्दै हाल सिन्धुपाल्चोक जिल्ला इन्चार्जको जिम्मेवारी तोकिएको छ । अराजक कार्यमा संलग्न जगत पटक पटक विभिन्न अपराधिक कार्यमा संलग्न रहेको निकटहरु बताउँछन् ।  प्रहरीले घटनासम्बन्धी अनुसन्धान अघि बढाएको जनाएको छ ।