धादिङमा एमाले भर्सेज तीनदलीय गठबन्धनको भिडन्त

-शंकर श्रेष्ठ

धादिङमा एमाले भर्सेज गठबन्धनको उम्मेदवारी परेको छ । जिल्लामा २ नगरपालिका र ११ गाउँपालिका छन् । नेपाली कांग्रेस,नेकपा माओवादी केन्द्र र नेकपा एकीकृत समाजवादीले गठबन्धन गरेर संयुक्त उम्मेदवार उठाएका छन् । नेकपा एमालेले एक्लै उम्मेदवारी दिएको छ ।

गठबन्धन अन्तर्गत कांग्रेसले ८ प्रमुख र ४ उपप्रमुख,नेकपा माओवादीले ३ प्रमुख र ५ उपप्रमुख,समाजवादीले २ प्रमुख र ४ उपप्रमुखमा उम्मेदवारी दर्ता गरेका छन् । कांग्रेसले प्रमुख पद पाएको नीलकण्ठ नगरपालिकामा भीमप्रसाद ढुंगाना, खनियाबास गाउँपालिकामा रणबहादुर तामाङ उठेका छन् । ढुंगाना र तामाङ पहिलो निर्वाचनबाट पनि विजयी उम्मेदवार हुन् ।

गंगाजमुनामा भक्तबहादुर लामा, नेत्रावती डबजोङमा मेघनाथ रिजाल, त्रिपुरासुन्दरी गाउँपालिकामा राजु उप्रेती,ज्वालामुखी गाउँपालिकामा यमनाथ दनै,सिध्दलेक गाउँपालिकामा परशुराम खतिवडा, थाक्रे गाउँपालिकामा रामप्रसाद बिडारीलाई कांग्रेसले उम्मेदवार बनाएको छ ।

गठबन्धनअन्तर्गत नेकपा माओवादी केन्द्रले प्रमुख पद पाएको रुबिभ्यालीमा रामसिंह तामाङ, बेनिघाट रोराङमा कृष्णबहादुर थपलिया र गजुरीमा गणेशलाल श्रेष्ठले मनोनयन दर्ता गरेका छन् । भागबण्डामा माओवादीले उपप्रमुख पद पाएको नीलकण्ठ नगरपालिकामा दिपक विश्वकर्मा, नेत्रावती डबजोङमा उर्मिला गुरुङ तामाङ,त्रिपुरासुन्दरीमा देवराज धरेल,खनियाबासमा सेतेमान तामाङ र थाक्रेमा यन्त्रबहादुर थापाले मनोनयन दर्ता गराएका छन् ।

गठबन्धन गर्दा भागबण्डामा नपरेका पालिकाहरुमा पनि माओवादीले उम्मेदवारी दर्ता गराएका छन् । वडा तहसम्म नै तालमेल गर्ने भनेर पालिकाहरुको भागबण्डा मिलाइएको भएपनि मनोनयन दर्ता गर्नेबेलासम्म वडा तहमा सहमति नजुटेपछि सबै पदमा उम्मेदवारी दिइएको नेकपा माओवादी धादिङका अध्यक्ष मनराज भण्डारीले बताए । ‘अहिलेलाई मनोनयन दर्ता गरेका छौं,पछि वडा तहको सहमति भयो भने मनोनयन फिर्ता लिएर पनि निर्वाचनमा सहभाागी हुन सक्छौं’ अध्यक्ष भण्डारीले भने ।गठबन्धनकै तर्फबाट समाजवादीले धुनिबेसी नगरपालिकाको मेयरमा अध्यक्ष बालकृष्ण आचार्य,गल्छी गाउँपालिकाको अध्यक्षमा कृष्णहरि श्रेष्ठलाई उम्मेदवार बनाएको छ । आचार्य र श्रेष्ठ दुबै २०७४ सालको स्थानीय निर्वाचनमा नेकपा एमालेबाट विजयी हुन् ।

समाजवादीले गठवन्धनमा उपाध्यक्ष भागमा परेको ज्वालामुखी गाउँपालिकामा धर्मबहादुर अर्याल, बेनिघाट रोराङ गाउँपालिकामा टापबहादुर श्रेष्ठ,सिध्दलेक गाउँपालिकामा सविता अर्याल र गंगाजमुना गाउँपालिकामा नारायण कार्कीलाई उम्मेदवार बनाएको छ । समाजवादीले गठबन्धनको तर्फबाट उपाध्यक्षको उम्मेदवार बनाएका चारैजना नयाँ अनुहार हुन् । उनीहरु नेकपा एमालेमा विद्रोह गरी समाजवादीतिर लागेका जिल्लामा परिचित नेता हुन् ।

प्रदेशस्तरीय ५ दलीय गठबन्धनको निर्णयबमोजिम नै नगरपालिकाको प्रमुख,उपप्रमुख र गाउँपालिका अध्यक्ष,उपाध्यक्षको टुंगो लगाएर त्यहिअनुसार मनोनयन दर्ता गराइएको एकीकृत समाजवादी धादिङका इन्चार्ज गुरुप्रसाद बुर्लाकोटीले बताए ।

गठबन्धनसँग भिड्न नेकपा एमालेले जिल्ला सदरमुकाम रहेको नीलकण्ठ नगरपालिकाको मेयरमा गंगादेवी श्रेष्ठ र उपमेयरमा फन्द्रा तामाङलाई उम्मेदवार बनाएको छ ।एमालेले धुनिबेसीमा रामराजा पाण्डे र मन्दिरा श्रेष्ठ,थाक्रेमा कृष्ण पन्त र अम्बिका रुपाखेती,गल्छीमा केदार खतिवडा र राधा तिमल्सिना, गजुरीमा राजेन्द्रविक्रम बस्नेत र अम्बिका खतिवडा,बेनीघाट रोराङमा देवप्रकाश त्रिपाठी र हिरादेवी रेग्मी, सिध्दलेकमा प्रेमनाथ सिलवाल र कमला शर्मालाई उम्मेदवार बनाएको छ ।

त्यस्तै ज्वालामुखीमा हरिराम लोहरी र चन्द्रकुमारी अधिकारी, त्रिपुरासुन्दरीमा उमेश थापा र संगिता कुमाल,नेत्रावती डबजोङमा सुवर्ण रिमाल र विनाकुमारी मम्बा, गंगाजमुनामा भक्तबहादुर लामिछाने र एञ्जिला तामाङ,खनियाबासमा इमान तामाङ र खुर्पीकुमारी तामाङ, रुबिभ्यालीमा प्रेम तामाङ र मञ्जु तामाङलाई उम्मेदवार बनाएका छन् ।