रिसै रिसले अघिल्लो दिनसम्म काँग्रेस, मनोनयनपछि अर्कै दलका उम्मेदवार

पाँचदलीय सत्ता गठबन्धनका कारण नेपाली काँग्रेसबाट उम्मेदवार उठ्न नपाएपछि काँग्रेसका एक जना वडा सभापतिले राजीनामा दिएर एमालेबाट उम्मेदवार उठेका छन् । स्याङ्जाको गलकोट नगरपालिका–६ का सभापति भक्त नेपाली काँग्रेस परित्याग गरी एमालेबाट वडाध्यक्षको पदमा उठेका हुन् ।

काँग्रेसले विचार नमिल्नेहरूसँग अप्राकृतिक गठबन्धन गरेको आरोप लगाउँदै नेपालीले एमाले रोजेको बताएका छन् ।

उता बागलुङको जैमिनी नगरपालिकामा एमालेबाट उपप्रमुखमा उम्मेदवारी दिएकी यमुनादेवी शर्मा पनि नेपाली काँग्रेसको क्षेत्रीय प्रतिनिधि थिइन् । उनले यसअघि महिला संघको सचिव समेत भएर काम गरिसकेकी छिन् ।

शर्माले काँग्रेसबाट उपमेयरको टिकट आकांक्षा राखेकी थिइन् । जैमिनीमा काँग्रेसले जनमोर्चालाई मेयर पदको उम्मेदवारी दिएको छ भने आफ्ना पार्टीका हरिहर शर्मालाई उपमेयर उठाएको छ । त्यहि रिसमा यमुनादेवीले एमाले रोजेकी हुन् ।