‘कण्डम लगाएर’ बलात्कार गरेका एमाले सांसदका आफन्तमाथि पीडितलाई दुःख दिएको आरोप

बलात्कार आरोपमा जेल परेर धरौटीमा छुटेका एमाले सांसद मोहन बानियाँमाथि पीडितलाई धम्क्याएको आरोप लागेको छ । पाँच लाख रुपैयाँ धरौटी बुझाएर छुटेपछि सांसद बानियाँका आफन्तले आफूलाई धम्की दिन थालेको पीडित महिलाले गुनासो गरेकी छिन् ।

पीडितका अनुसार धरौटीमा छुटिसकेपछि सामाजिक सञ्जाल तथा टेलिफोनबाट बानियाँका आफन्तले बयान फेर्न दबाब दिइरहेका छन् । उनका आफन्त नरेन्द्रबहादुर रावलले सामाजिक सञ्जालमा लेखेका छन्, ‘बयान चेञ्ज गर्न सकिन्छ कि हजुर के छ ? कुरो र कुलो जता लायो उतै जाने हो ।’

पीडित महिलाले उनलाई धरौटीमा रिहा गरेर अन्याय भएको पनि बताएकी छन् । उनले भनिन, ‘एक त आफू अन्यायमा छु त्यसैमा बानियाँका आफन्तबाट दबाब आउन थालेको छ । झनै असुरक्षित महशुस भइरहेको छ ।’

सांसद बानियाँले माघ १९ गते नेपालगञ्जको होटलमा जुम्लाकी ४० वर्षीया एक महिलालाई बलात्कार गरेको भन्दै माघ २७ गते जिल्ला प्रहरी कार्यालय बाँकेमा उजुरी परेको थियो । उजुरीपछि फागुन १६ गते सांसद बानियाँ नेपालगञ्ज विमानस्थलबाट पक्राउ परेका थिए ।

आफूले दिएको २५ लाख रुपैयाँ फिर्ता गर्छु भनेर सांसद बानियाँले होटलमा बोलाएको र कण्डम प्रयोग गरेर दुई पटक बलात्कार गरेको ती महिलाले प्रहरीमा बयान दिएकी थिइन् । बलात्कार आरोपमा प्रहरी हिरासतमा रहेका उनी बाँके जिल्ला अदालतको आदेशले चैत २ गते धरौटीमा छुटेका थिए ।

मुगुका बानियाँ एमालेबाट समानुपातिक सांसद हुन् । केपी ओली प्रधानमन्त्री हुँदा उनी केही समय प्रधानमन्त्री तथा मन्त्रिपरिषद कार्यालय हेर्नेगरी विना विभागीय मन्त्री भएका थिए ।