एमालेले संसदको अवरोधबारे आज निर्णय गर्ने

एमाले संसदीय दलका उपनेता सुवासचन्द्र नेम्वाङले संघीय संसद अवरोध गर्ने कि नगर्ने भन्नेबारे पार्टीले निर्णय गरि नसकेको बताएका छन् । मदन–आश्रित स्मृति दिवसको अवसरमा बल्खुमा आयोजित कार्यक्रमपछि सञ्चारकर्मीहरूसँग कुरा गर्ने क्रममा नेम्वाङले संसद्को अवरोधलाई स्थानीय तहको निर्वाचनसँग जोडेका थिए ।

‘हामी अहिले नयाँ निस्कर्षमा पुगिसकेका छैनौं । तर छलफलमा छौं । स्थानीय निकायको निर्वाचनको सम्बन्धमा जनताको बीचमा गएका छौं । जनताले एउटा निस्कर्ष दिएका छन् त्यो निस्कर्षमा पूर्णता आउन बाँकी छ । यो सबै सन्दर्भलाई हामी ध्यानमा राखेर विचार गरिरहेका छौं । तर अहिले नै नयाँ निर्णयमा पुगिसकेका छैनौँ,’ उनले भने । नेम्वाङले पार्टीका शीर्ष नेताहरू संसद्‌मा कसरी प्रस्तुत हुने भनेर निर्णय लिनका लागि परामर्शमा रहेको पनि जानकारी दिए ।

प्रतिनिधिसभा र राष्ट्रियसभाको बजेट अधिवेशनको बैठक आजदेखि शुरु हुँदैछ । २०७८ भदौदेखि संघीय संसद्का दुवै सदन अवरोध गर्दै आएको एमालेले यो अधिवेशनमा के गर्ने भन्नेबारे निर्णय गरिसकेको छैन । संसदीयदलका उपनेताले नेम्वाङले मंगलबार ३ बजेसम्म निर्णय लिने जानकारी दिए ।

एमाले विभाजन गर्न सरकारले अध्यादेश ल्याएको र माधवकुमार नेपालको नेतृत्वमा पार्टी विभाजन गरिएको भन्दै एमालेले संसद अवरोध गर्दै आइरहेको छ । सोहि विषयलाई लिएर सर्वोच्च अदालतमा मुद्दा विचाराधीन छ ।