काठमाडौंमा रविन्द्र खुम्चिए, लण्डनमा बीबीसी खुम्चियो

बीबीसी नेपाली सेवा प्रमुखको जागिर छाडेर नेपालको राजनीतिमा होमिएका रविन्द्र मिश्रको विवेकशील साझा पार्टी स्थापनाको एकाध वर्षमै मैझारो हुने अवस्थामा पुगेको छ । अघिल्लो स्थानीय तह र प्रदेश तथा संघीय संसदको निर्वाचनमा निकै चर्चामा रहेको उक्त पार्टी हालै सम्पन्न स्थानीय तहको निर्वाचनमा जमानत पनि जोगाउन नसक्ने अवस्थामा पुगेको हो ।

२०७४ को स्थानीय तह निर्वाचनमा काठमाडौं महानगरपालिकाको मेयरमा उठाइएकी उक्त पार्टीकी उम्मेदवार रञ्जु दर्शनाले लोकप्रिय मत पाएकी थिइन् । त्यस्तै किशोर थापाले पनि उस्तै भोट ल्याएका थिए ।

लगत्तै भएको प्रदेश सभा निर्वाचनमा विवेकशीलले एक जना सांसद जिताएको थियो । तर अहिले राजधानीमा उक्त पार्टीका उम्मेदवारको अवस्था शर्मनाक देखिएको छ ।

यसबीच बीबीसी नेपाली सेवाले आफ्नो सेवाको अवधिलाई दुई तिहाईले घटाउने निर्णय गरेको छ । आगामी सातादेखि बीबीसी नेपाली सेवाले बिहान प्रशारण हुँदै आएको १५ मीनेट कार्यक्रम सँधैको लागि बन्द गर्दैछ ।

जुन १ तारिखदेखि साँझ पौने ९ बजेदेखि सवा ९ बजेसम्म प्रशारण गर्दै आएको ३० मीनेटको कार्यक्रमलाई १५ मीनेटमा झार्न लागिएको छ । पछिल्ला दिनमा रेडियोको परम्परागत कार्यक्रम प्रशारणको प्रभावकारितामा ह्रास आएपछि खर्च कटौतीको निम्ति यस्तो निर्णय भएको बुझिएको छ ।

बीबीसीका अन्य भाषामा झैँ नेपाली सेवातर्फ पनि अनलाइन प्रशारण र सामाग्रीलाई जोड दिइने बताइएको छ।