केटी नखोज्दिएको भन्दै गाली गरेको रिस फेर्न हत्या
यौन सम्पर्क गर्न केटी नखोजिदिएको भन्दै गालीगलौज गरेको ईखले होटलमा काम गर्ने दुई किशोरले एक व्यक्तिको हत्या गरेको खुलेको छ ।
धरान उपमहानगरपालिका-१५ बगरकोटस्थित भेटघाट सेकुवा कर्नरमा काम गर्दै आएका दुई किशोरले गाली गरेको रिस फेर्न धरान-११ बिष्णु चौकका ३१ बर्षीय सन्दिप लम्जेललाई झुक्याएर एकान्तमा बोलाई धारिलो हतियार प्रहार गरेर हत्या गरेको खुलेको हो ।
प्रहरीका अनुसार उनीहरुले जेठ ११ गते लम्जेललाई यौनसम्पर्क राख्न केटी खोजिदिएको बहाना बनेर धरान-१५ को सेउती खोलाको खोरिया बस्तीमा बोलाई शवलाई ढुंगाले किचेर फरार भएका थिए ।
हत्या गरिएका लम्जेलको शव १२ जेठ बिहान फेला परेको थियो । हत्या गरी फरार भएका उनीहरुलाई प्रहरीले दुई दिनभित्रै धनकुटास्थित उनीहरुकै घरबाट पक्राउ गरेको हो । पक्राउ परेका उनीहरुलाई कर्तव्य ज्यानसम्बन्धी कसुरमा म्याद थप गरी इलाका प्रहरी कार्यालय धरानले अनुसन्धान गरिरहेको छ ।
टिप्पणीहरू