इच्छाराजद्वारा डिभोर्सपछि अंशबण्डा,छोरीले हालिन् बाबुलाई मुद्दा

बैंकर,घरजग्गा व्यवसायी तथा एमालेको तर्फबाट संविधान सभा सदस्य इच्छाराज तामाङले सम्पत्ति जोगाउन केही वर्षअगाडि नै श्रीमती सिर्जना शाक्यलाई डिभोर्स दिएका थिए । एउटै घरमा बस्दै आएका उनीहरुले कागजी रुपमा मात्रै सम्बन्धविच्छेद गरेका हुन् ।

तामाङ गत असोजदेखि प्रहरी नियन्त्रणमा र पुसदेखि जेलमा छन् । अहिले भने तामाङ र शाक्यबीच कानुनी मात्र नभएर व्यवहारिक हिसाबले नै सम्बन्धविच्छेद भएको छ । १० महिनादेखि श्रीमान जेलमा छन् भने श्रीमती भूमिगत छिन् ।

दुई हजार बढी सर्वसाधारणलाई महँगो ब्याजदरको लोभमा सात अर्बभन्दा बढी ठगेका इच्छाराजले अहिले नयाँ फण्डा निकालेका छन् । आउँदो बिहीबारका निम्ति तामाङ र उनका जेठान तथा सिभिल सहकारी एण्ड क्रेडिट कोअपरेटिभका अध्यक्ष केशवलाल श्रेष्ठविरुद्ध उच्च अदालत पाटनमा ठगिएकाहरुले हालेको मुद्दाको पेसी थियो । तर अहिले साप्ताहिक पेसी सूचीमा उक्त मुद्दा नदेखिएपछि उनीहरुले अनेक आशंका गरेका छन् ।

“पहिलेको मुद्दा नम्बर ०७८–आरई–१५४० को सट्टा नयाँ मुद्दा देखिन आएको हो । पीडितहरुले दायर गरेको मुद्दाको ठाउँमा गत फागुन २ गते छोरी प्रतिक्षा तामाङले आफ्ना बाबु इच्छाराजविरुद्ध हालेको मुद्दा अहिले साप्ताहिक पेसीमा चढेको छ”

इच्छाराज र केशवलालविरुद्ध पीडितहरुले दायर गरेको मुद्दाको सट्टा अहिले अर्कै मुद्दा देखिएको बताइन्छ । पहिलेको मुद्दा नम्बर ०७८–आरई–१५४० को सट्टा नयाँ मुद्दा देखिन आएको हो । पीडितहरुले दायर गरेको मुद्दाको ठाउँमा गत फागुन २ गते छोरी प्रतिक्षा तामाङले आफ्ना बाबु इच्छाराजविरुद्ध हालेको मुद्दा अहिले साप्ताहिक पेसीमा चढेको छ ।

२८ वर्षकी छोरी प्रतिक्षाले उच्च अदालत पाटनमा बाबुसँग अंश माग्दै मुद्दा हालेकी हुन् । सुन्धाराको सिटिसी मलसँग सम्बन्धित हालिएको मुद्दाको भित्री चाहना अर्कै हुनसक्ने आशंका गरिएको छ । इच्छाराज र छोरीले सिभिल सहकारीको ऋण नतिर्ने प्रपञ्चमा मिलेमतोमा मुद्दा दायर गरेको धेरैको अनुमान छ ।

यसअघि तामाङले प्रहरी र अदालतसमक्ष दिएको बयानमा पनि छोरीलाई अंश दिइसकेको लिखित बयान दिएका थिए । उनले सवाल नम्बर १० को जवाफ दिँदै भनेका थिए,‘मैले बुबाको भाइ एक जना र बुबाबीच हालसम्म पनि अंशबण्डा नभएको कारणले र म बुबासँग अंश नलिई छुट्टिएर ३५ वर्षदेखि आफूले नै बन्दोबस्त गरिआएको छु । सोही कारण मैले श्रीमती र छोरीहरुलाई अंशबण्डा गरिदिएको हो ।