दूरसञ्चार प्राधिकरणमा पनि कालो तुल टाँगियो, सेटिङमा कार्यालय सारिएको कर्मचारीहरुको आरोप

नेपाल दूरसञ्चार प्राधिकरणका कर्मचारीहरु चार बुँदे मागसहित आन्दोलनमा उत्रिएका छन् । नेपाल दुरसञ्चार प्राधिकरण स्वतन्त्र कर्मचारी यूनियनले हिजोदेखि राष्ट्रिय नाचघर जमलमा रहेको कार्यालयमा आन्दोलन थालेको हो ।

प्रतिकूल कार्य वातावरण र स्थानका कारण स्वास्थ्यमा गम्भीर असर परेको भन्दै आन्दोलनमा उत्रिएका हुन् । उनीहरुले चार बुँदे माग राखेका छन् ।

मागमा श्रम नियमावली, २०७५ को नियम ४४ (ख) बमोजिम कर्मचारीलाई पर्याप्त शुद्ध हावा, प्रकाश एवंम् उपयुक्त तापक्रमसहितको कार्यकक्ष हुनुपर्ने, यूनियनको तर्फबाट २०७८ पुष २ मा पेश भएका मागहरु पूरा गर्नुपर्ने, कर्मचारीहरुलाई प्रदान गरिँदै आएको ऋण सापटी सुविधालाई बीमासँग तत्काल आबद्ध गरिनुपर्ने र आधारभूत मापदण्ड समेत पूरा नभएको स्थानमा कार्यालय स्थानान्तरण गर्ने निर्णयमा संलग्न पदाधिकारी र समितिउपर कारबाही हुनुपर्ने उल्ले छ ।