दोहोरी गीत प्रतिष्ठानको नेतृत्वमा सर्वसम्मत, रीता थापामगर अध्यक्ष

 राष्ट्रिय लोक तथा दोहोरी गीत प्रतिष्ठान नेपालको अध्यक्षमा धादिङकी रीता थापामगर सर्वसम्मत निर्वाचित भएकी छन् । 

धादिङबेसीमा भएको प्रतिष्ठानको आठौं केन्द्रीय महाधिवेशनबाट थापामगर सर्वसम्मत अध्यक्ष चुनिएकी हुन् । उक्त क्षेत्रमा एक दशकदेखि सक्रिय थापामगरले यसअघि प्रतिष्ठानको विभिन्न पदमा रहेर काम गरिसकेकी बताइएको छ ।

महाधिवेशनले प्रतिष्ठानको वरिष्ठ उपाध्यक्षमा स्याङ्जाका पशुपति शर्मा र प्रथम उपाध्यक्षमा रामजी खाँड चुनेको छ । सांगठनिक उपाध्यक्षमा सुवास केसी, प्रशासनिक उपाध्यक्षमा दिपक खड्का र महिला उपाध्यक्षमा राधिका हमाल सर्वसम्मत भएका हुन् ।

सात जनाको खुल्ला उपाध्यक्षमा १० जनाको उम्मेदवारी परेको छ । पुष्कल शर्मा, राजु ढकाल, चोलेन्द्र पौडेल, कृष्ण रेउले, खुमन अधिकारी, कुलेन्द्र विश्वकर्मा, पूर्णकला बिसी, शंकर बिसी र तारापती सुवेदीको उम्मेदवारी परेको छ । 

प्रतिष्ठानको महासचिवमा शिव हमाललाई सर्वसम्मत बनाइएको छ । त्यसैगरी उपमहासचिवमा हरि डाँगी (प्रशासनिक) र शिरीष देवकोटा (सांगठनिक), कोषाध्यक्षमा अमृत अधिकारी सर्वसम्मत निर्वाचित भएको जानकारी दिइएको छ । महिला सचिवमा जमुना राना सबैको रोजाईमा परेकी छन् ।

सातवटा प्रदेशमध्ये भूगोल सचिवमा गण्डकी प्रदेश बाहेक सबै प्रदेशमा सर्वसम्मत भएको छ । गण्डकी प्रदेशमा तीन जनाको उम्मेदवारी परेको छ । तीन जनाको खुल्ला सचिव पदमा पनि पाँच जना र दुई जनाको सहकोषाध्यक्ष (खुल्ला) पदमा तीन जनाको उम्मेदवारी परेको छ ।

नेतृत्व चयनमा केही दिन अघिदेखि नै सर्वसम्मतको प्रयास भएको बताइन्छ । खुल्ला उपाध्यक्ष, भूगोल सचिवतर्फ गण्डकी प्रदेश, खुल्ला सचिव, खुल्ला सहकोषाध्यक्ष पदबाहेक पदाधिकारीहरु सर्वसम्मत निर्वाचित भएका छन् । महाधिवेशनबाट ३५ जनाको पदाधिकारीसहित ७५ सदस्यीय कार्यसमिति चयन हुने व्यवस्था छ ।