प्रमुख प्रशासकीय अधिकृत हिँडेपछि गाउँपालिकाको काम ठप्प
खोटाङको दिप्रुङ चुइचुम्मा गाउँपालिकाका प्रमुख प्रशासकीय अधिकृत सरोज रेग्मी बिना जानकारी हिँडेपछि सबै काम ठप्प भएका छन् । उनको अनुपस्थितिपछि अन्य कर्मचारीले समेत मर्कामा परेको बताएका छन् ।
कार्यालयलाई कुनै जानकारी नै नगराईकन उनी हिजो बिहान सबेरै घर गएपछि कर्मचारीको तलब र ठेकेदारहरुको भुक्तानी रकम रोकिएको छ । दशैं अगाडि पाउनुपर्ने तलब रोकिएपछि कर्मचारीहरु आक्रोशित बनेका हुन् ।
हाल गाउँपालिकाबाट हुने सम्पूर्ण भुक्तानी ठप्प भएको अध्यक्ष लोकेन्द्र राईले बताए । रेग्मी हिँडेपछि अन्य टाढा पुग्ने कर्मचारीलाई समस्या परेको छ । २४ घण्टाभित्र उपस्थित हुन निर्देशन दिएपनि उनी अझै कार्यालयमा हाजिर भएका छैनन् ।
‘उहाँ हिजो बिहान जानकारीबिना घर जानुभएछ । हामीले दिनभरि फोन गर्यौं, उठाउनुभएन । सिडियोलाई भनेपछि प्रहरीमार्फत खोजतलास शुरु भयो । अनि बल्ल सम्पर्कमा आउनुभयो । मैले तत्काल कार्यालयमा हाजिर हुनु भनेको थिएँ । तर, अहिलेसम्म कुनै अत्तोपत्तो छैन’, उनले भने ।
उनी हिँडेपछि धेरै वटा भुक्तानी रोकिएको अध्यक्ष राईले जानकारी दिए । कर्मचारीको तलब, सिँचाई योजना, भवन निर्माण, बाटोघाटो सरसफाइलगायतको भुक्तानी रोकिएको छ । रेग्मी गत भदौ २९ गतेदेखि उक्त गाउँपालिकामा कार्यरत छन् ।
टिप्पणीहरू