प्रधानमन्त्रीमाथि हुटिङ्ग गर्नेको पहिचान खोज्दै प्रहरी

प्रधानमन्त्री केपी शर्मा ओलीविरुद्ध हिजो साँझ त्रिपुरेश्वरमा ‘अमर्यादित नाराबाजी’ गर्नेहरूलाई प्रहरीले खोजिरहेको छ।

सहकारी ठगी गरेको आरोपमा कास्की प्रहरीको हिरासतमा रहेका रवि लामिछाने र काठमाडौँ महानगरका मेयर बालेन साहको नाममा दशरथ रंगशालाभित्र हुलदंगा गर्न खोज्ने कतिपय युवाको पहिचान भइसकेको सुरक्षा स्रोतले जनाएको छ ।

‘हिजो साँझ मैदानमा प्रधानमन्त्रीविरुद्ध नाराबाजी गर्नेहरू सबैजसो रास्वपाकै कार्यकर्ता रहेछन्,’प्रहरी स्रोतले भन्यो,‘तीमध्ये धेरैको पहिचान भइसक्या छ । कतिलाई भिडियोमार्फत् पहिचान गर्दैछौँ । थप कारबाही अघि बढाउँछौँ ।’ 

तिनै सुरक्षाकर्मीले संगठित रुपमा रंगशाला छिरेर प्रधानमन्त्रीविरुद्ध नाराबाजी र हो–हल्ला गर्नेहरूको भिडियो कैद गरेका थिए ।

प्रधानमन्त्री ओली फुटबल हेर्न दशरथ रंगशाला जानसक्ने संकेत पाएलगत्तै रास्वपा कार्यकर्ताले हुलदंगा गर्ने योजना बनाएका थिए। तर,उनीहरूको त्यो योजना रोक्न र पहिचानका लागि प्रहरीले सादा पोशाकमा जवानहरू खटाएको थियो । तिनै सुरक्षाकर्मीले संगठित रुपमा रंगशाला छिरेर प्रधानमन्त्रीविरुद्ध नाराबाजी र हो–हल्ला गर्नेहरूको भिडियो कैद गरेका थिए ।

‘कतिलाई सम्झाइ–बुझाइ गर्छौं । कतिलाई अनुसन्धानका लागि बोलाउँछौँ । आवश्यक परे थुन्छौँ, उनीहरूको पृष्ठभूमि हेर्छौं । संगठित रुपमा रंगशाला छिरेका हुन् कि लहै लहैमा नाराबाजी गरेका हुन् ? उनीहरूको गतिविधि नियालिरहेका थियौँ,’ नाराबाजीको पहिचानमा खटिएका अधिकारीले भने ।