संस्कृत विश्वविद्यालयमा उपकुलपति नियुक्तिको तयारी

नेपाल संस्कृत विश्वविद्यालयमा उपकुलपति नियुक्तिको तयारी गरिएको छ । उपकुलपति नियुक्तिका लागि नाम सिफारिस गर्न गठित छनौट तथा सिफारिस समितिले आज सूचना जारी गर्दै दरखास्त आह्वान गरेको हो । 

समितिले योग्यता पुगेका इच्छुक व्यक्तिलाई आवेदन पेश गर्न भनेको छ । ‘नेपाल संस्कृत विश्वविद्यालयको उपकुलपति छनौट तथा सिफारिससम्बन्धी कार्यविधि, २०८१’ बमोजिम दरखास्त आह्वान गरिएको समितिले जनाएको छ । 

कार्यविधिको अनुसूची–१ मा उल्लेख गरिएको ढाँचामा सूचना प्रकाशित भएको मितिले दश दिनभित्र शिक्षा, विज्ञान तथा प्रविधि मन्त्रालयको उच्च शिक्षा शाखामा दरखास्त पेश गर्न भनिएको छ । दरखास्त दिने अन्तिम दिन सार्वजनिक बिदा परेमा त्यसपछि कार्यालय खुलेको दिनमा आवेदन पेश गर्न सकिनेछ ।