तराईबाट हौसिएको माओवादी अब मध्यपहाडमा

हुलाकी राजमार्ग केन्द्रित अढाई महिने जनजागरण अभियान सकेलगत्तै मध्यपहाडी लोकमार्ग केन्द्रित अभियान सञ्चालन गर्न लागेको नेकपा माओवादी केन्द्रले कार्यक्रमको खाका तय गरेको छ । 

‘जनतासँग माओवादी : मध्यपहाडी लोकमार्ग जनजागरण अभियान’ जेठ महिनाभित्र सम्पन्न हुने गरी कार्यक्रम बनाएको सो पार्टीले जनाएको छ । जसअनुसार अभियान जेठ १ गते डडेल्धुरा जिल्लाबाट शुरु हुनेछ ।  

भोलिपल्ट २ गते बैतडीको पाटनमा जनसभा र डोटीको दिपायल जनसंवाद सम्वाद कार्यक्रम राखिएको छ । अछामको मङ्गलसेनमा ३ गते जनसंवाद गरेर भोलिपल्ट दैलेख सदरमुकाममा जनसभा आयोजना गरिने जनाइएको छ । 

अभियान अन्तर्गत जेठ ५ गते जाजरकोट खलङ्गामा जनसंवाद, ६ गते पश्चिम रुकुमको चौरजहारीमा जनसभा र मुसिकोटमा जनसंवाद गरिने छ । जेठ ७ गते पूर्वी रुकुमको रुकुमकोट जनसंवाद र त्यहि दिन रोल्पाको थवाङमा जनसभा आयोजना गरिने छ । 

जेठ ८ गते बागलुङ र ९ गते पर्वतको कुस्मामा जनसंवाद गर्ने माओवादीको निर्णय छ । १० गते कास्कीको पोखरामा जनसभा गर्ने कार्यक्रम छ । पार्टी अध्यक्ष प्रचण्डलगायतका शीर्ष नेता अभियानमा सहभागी हुने जानकारी प्राप्त भएको छ । 

गत पुस २३ गते सम्पन्न केन्द्रीय समिति बैठकले फागुनदेखि असारसम्म हुलाकी मार्ग, मध्यपहाडी लोकमार्गका साथै हिमाली जिल्लामा केन्द्रित रहेर ‘जनतासँग माओवादी’ अभियान चलाउने निर्णय गरेको थियो । निर्णयअनुसार फागुन १२ गते देशकै होचो स्थान झापाको कचनकवलबाट शुरु भएको हुलाकी मार्ग अभियान वैशाख १७ गते कन्चनपुरको महेन्द्रनगर पुगेर सम्पन्न भएको थियो ।

पहिलो चरणको अभियान सोचेभन्दा बढी उपलब्धिपूर्ण भएको निष्कर्ष निकालेको माओवादीले बैशाख २० गते पदाधिकारी बैठक राखेर मध्यपहाडी अर्थात् पुष्पलाल लोकमार्ग केन्द्रित अभियान शुरु गर्ने निर्णय गरेको हो ।