तयारी अवस्थामा रहन सशस्त्रलाई गृहमन्त्रीकाे निर्देशन

गृहमन्त्री रमेश लेखकले सशस्त्र प्रहरी बल, नेपालको प्रधान कार्यालय, हल्चोक पुगेर विपद् व्यवस्थापनको पूर्वतयारी तथा प्रतिकार्यको कार्ययोजनाबारे ब्रिफिङ लिएका छन् । सो क्रममा संक्षिप्त मन्तव्य राख्दै मन्त्री लेखकले जल तथा मौसम विज्ञान विभागले यस वर्ष सरदरभन्दा बढी वर्षा हुने आकलन गरेकाले विपद्का घटना बढ्न सक्ने सम्भावनातर्फ सजग गराएका हुन् । सशस्त्र प्रहरी बल, नेपाललाई सबैखालका जोखिमका लागि तयारी अवस्थामा रहन निर्देशन दिएका छन् ।

गृहमन्त्री लेखकले सशस्त्र प्रहरी बल विपद् व्यवस्थापनमा विज्ञ संगठन पनि भएकोले समयमै उद्धार गरेर मानिसको जीवन जोगाउने दायित्वमा अग्रपंक्तिमा रहनुपर्ने बताए । विपद् जोखिम न्यूनीकरण तथा व्यवस्थापनका सन्दर्भमा राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग नजिकको समन्वयमा रहन पनि सुझाव दिएका छन् । 

त्यस अवसरमा सशस्त्र प्रहरी बलका निमित्त प्रहरी महानिरीक्षक नारायणदत्त पौडेलले संगठनले यस वर्षका लागि मनसुन पूर्वतयारी तथा प्रतिकार्य कार्ययोजना तयार गरिसकेको जानकारी दिए । पूर्वतयारी तथा प्रतिकार्यलाई प्रभावकारी बनाउन वडा वडामा विपद् सूचक तयार पार्ने र विपद् स्वयंसेवकलाई तालिम दिने कार्यसमेत भइरहेको बताए । 

बिफ्रिङमा सातै प्रदेशका बाहिनीपतिले आ–आफ्नो क्षेत्रको जोखिम अवस्था, पूर्वतयारी एवं उद्धारका  अवस्थाबारे जानकारी गराएको बताइन्छ । 

कार्यक्रममा सशस्त्र प्रहरी वरिष्ठ उपरीक्षक दीगविजय सुवेदीले विपद्को समयमा सशस्त्र प्रहरी बल नेपालको भूमिका, क्षमता, तयारी र प्रतिकार्य योजनाको बारेमा प्रस्तुतीकरण गरेका थिए । 

नेपाल प्रहरीका महानिरीक्षक दिपक थापा, गृह मन्त्रालयका निमित्त सचिव जयनारायण आचार्य, सुरक्षा महाशाखा प्रमुख सहसचिव रामचन्द्र तिवारी, विपद् तथा द्वन्द्व महाशाखा प्रमुख सहसचिव डा.टोकराज पाण्डे, राष्ट्रिय विपद् जोखिम न्यूनीकरण तथा व्यवस्थापन प्राधिकरणका सहसचिव रोशनी कुमारी श्रेष्ठको पनि उपस्थिति थियो ।

मन्त्री लेखकले सशस्त्र प्रहरी बल, नेपालले प्रयोगमा ल्याएको खोज तथा उद्धारका सामग्रीहरुको समेत अवलोकन गरेका थिए । जल तथा मौसम विज्ञान विभागले यस वर्ष सरदरभन्दा धेरै वर्षा हुने आकलन सार्वजनिक गरेको सन्दर्भमा गृहमन्त्री लेखकले विपद्सँग सम्बन्धित सरकारी निकाय तथा निजी क्षेत्रसँग छलफल गरेको मन्त्रालयले जनाएको छ ।