मलामी बोकेको जीप गुल्मी जिल्लाको रिडी–खर्ज्याङ सडक खण्डअन्तर्गत रुरु गाउँपालिका–१ खोल्टेपानीमा दुर्घटना हुँदा एक जनाको मृत्यु भएको छ । आठ जना घाइते भएका छन् ।
आज दिउँसो पाल्पा जिल्लाको जोगिथुमबाट रिडीघाटमा मलामी लिएर आउँदै गरेको लु १ च ६९८५ नम्बरको जीप सडकबाट करिब १० मीटर तल खसेर दुर्घटनामा परेको थियो । दुर्घटनामा पाल्पाको रिब्दिकोट गाउँपालिका–१ का २६ वर्षीय टिकाराम कुमालको मृत्यु भएको हो ।
घाइतेहरूलाई उद्धार गरी उपचारका लागि रुरु प्राथमिक स्वास्थ्य केन्द्र रिडीमा पठाइएको जानकारी दिँदै गुल्मीका नायब उपरीक्षक गंगाबहादुर सारुले घाइतेहरूको अवस्था मध्यम रहेको बताए । दुर्घटनाको कारणबारे थप अनुसन्धान भइरहेको छ ।
