कैलाली–५ मा गगन पक्षबाट मनुको उम्मेदवारी

नेपाली काँग्रेसको प्रदेश कार्य समितिका महामन्त्री नरनारायण शाह (मनु) फागुन २१ गते तोकिएको प्रतिनिधि सभाको निर्वाचनमा कैलाली क्षेत्र नम्बर–५ बाट उठ्ने भएका छन् । निवर्तमान सभापति शेरबहादुर देउवानिकट मानिने महामन्त्री शाह विशेष महाधिवेशनबाट सभापतिमा निर्वाचित गगन थापा पक्षबाट उम्मेदवार बन्न लागेका हुन् । 

थापाले उम्मेदवार बन्न आग्रह गरेपछि उनी चुनावको तयारीमा जुटेका छन् । शाह पहिलोपटक चुनावमा होमिँदैछन् । महामन्त्री शाहले आफू चुनाव लड्ने निश्चित भएको पुष्टि गरे । पार्टीको जिल्ला सहसचिव र दुईपटक सभापति भएका उनी धनगढी जेसिज,क्रिकेट,फुटबल आयोजना गराउनेजस्ता सामाजिक गतिविधिमा जोडिँदै आएका छन् । 

काँग्रेसको भातृ संगठन नेपाल तरुण दल,कैलालीका अध्यक्षसमेत भएका शाह वि.सं.२०१५ सालको आम निर्वाचनमा काँग्रेसबाट निर्वाचित लोकेन्द्रबहादुर शाहका नाति र २०४९ मा जिविस सभापति मोहनबहादुर शाहका छोरा हुन् ।

उनले भने,‘अबको केही दिनमा आफ्नो चुनावी एजेण्डा सार्वजनिक गर्दैछु ।’ देउवा पक्षमा हुँदापनि उनले थापालाई सहयोग गरेका थिए । हुलाकी राजमार्ग कार्यक्रमको स्थानीय आयोजकझैंको भूमिका उनले निभाएका थिए । जबकि, देउवानिकट धेरैले सो कार्यक्रम बहिष्कार गरेका थिए । 

पछिल्लो आन्तरिक विवादले सुदूरपश्चिममा प्रभावशाली व्यक्ति चुनाव नलड्ने चर्चा चलेको बेला महामन्त्री शाह काँग्रेसबाट उम्मेदवार बन्नुलाई अर्थपूर्ण रुपमा हेरिएको छ । यता, नेकपा एमालेबाट सो क्षेत्रमा जिल्ला अध्यक्ष यज्ञराज ढुंगानालाई उम्मेदवार बनाउने निर्णय भएको छ । नेपाली कम्युनिष्ट पार्टी (नेकपा) बाट तीनपटक डोटीमा चुनाव जितेका पूर्वमन्त्री प्रेमबहादुर आलेले उम्मेदवारी दिने भएका छन् । 

सो क्षेत्रमा २०५१ सालको मध्यावधि, २०६४ को संविधान सभा निर्वाचन र २०७४ मा क्रमशः एमाले, तत्कालीन माओवादी र वाम गठबन्धनबाट एमालेले चुनाव जितेपनि २०१५, २०४८, २०५६, २०७० र २०७९ को निर्वाचनमा काँग्रेसले विजयी हासिल गरेको थियो ।