मसालमा पनि मज्जैको महाभारत
कम्युनिष्टहरु कमा र फुलस्टपमै झगडा गरेर विभाजित हुन्छन्, भनिन्छ । शव्द-शब्दमा जति धेरै बहस गर्न सक्यो उति धेरै क्रान्तिकारी होइन्छ भन्ने मान्यता कतिपयमा अझै पनि छ । त्यसमा मोहनविक्रम सिंहले नेतृत्व गरेको अर्धभूमिगत शैलीमा संन्चालित नेकपा मसाल अझै अगाडि छ ।
लामो समय मसालको एकछत्र नेतृत्व गर्नुभएका महामन्त्री सिंहमाथि फरक विचार र भिन्न मत राख्नेमाथि अनुदार हुने गरेको आरोप धेरै अगाडिदेखि लाग्दै आएको हो । फरक मत राख्नेलाई सिंहले अनेक बहानामा पार्टीबाट निकाल्ने गरेको गरेको आठौँ महाधिवेशनपछि कारवाहीमा परेका नेताहरुले बताएका छन् । कारवाहीमा परेका ६ जना नेताले संयुक्त वक्तव्य जारी गर्दै भिन्नमत राखेकै कारण आफूहरुमाथि महामन्त्री सिंहले अन्यायपूर्ण कारवाही गरेको बताए ।
‘केन्द्रीय समितिले भेटघाट वा वार्ताद्वारा विवाद समाधान गर्न निर्णय गरेको देखिन्छ भने महामन्त्रीद्वारा वक्तव्य,अन्तर्वार्ता, लेखहरुमा भिन्न मत राख्ने सदस्यहरुप्रति निराधार तथा तल्लोस्तरमा आक्षेपहरु लगाउने गरेको देखिएको छ । यसले गर्दा भिन्न मत राखेको कारणले पार्टीबाट विभिन्न बहानामा निश्कासित वा बिद्रोह गर्न बाध्य बनाइएका पदाधिकारी र सदस्यहरुलाई पार्टीमा पुनर्स्थापित गर्न नेतृत्व इमान्दार छैन कि भन्ने आशंका उत्पन्न भएको छ’, संयुक्त वक्तव्यमा भनिएको छ ।
आठौँ महाधिवेशनमा फरक दस्तावेजको प्रस्तावक रहेका ६ जना केन्द्रीय सदस्य (जो पछि कारवाहीमा परे) हरुले पार्टीबाट निश्कासित तथा फुटेर गएकासँग भेटघाट र वार्ता गर्न मसालले कार्यदल बनाएकोमा खुशी व्यक्त गरेपनि महामन्त्री सिंहको कार्यशैलीको भने विरोध गरेका छन् । भदौ २९ देखि ३१ गतेसम्म बसेको मसालको केन्द्रीय समितिको वैठकले पार्टीबाट निश्कासित वा फुटेर गएकासँग भेटघाट वा वार्ता गर्न कार्यदल बनाएको र त्यसैका आधारमा आफूहरुले पनि वार्ता गर्न वक्तव्य सार्वजनिक गरेको उनीहरुले प्रष्ट्याएका छन् ।
उनीहरुले पार्टी र नेतृत्वद्वारा गरिएका सबै गलत पध्दति तथा नीतिहरुको विरोध गर्दै आठौं महाधिवेशनमा भिन्नमतको दस्तावेज प्रस्तुत गर्नेहरु नेतृत्वसँग वार्ता गरेर पार्टीलाई क्रान्तिकारी दिशा दिन तयार रहेको बताएका छन् ।
मसालको आठौँ महाधिवेशनमा कृष्णराज पौडेल,विमल शर्मा, गोविन्दसिंह थापा,रामबहादुर बुढा, सुरेन्द्र भण्डारी र ओमबहादुर केसीले फरक मत राखेका थिए । फरक मत राखेकै आधारमा महामन्त्री सिंहले अनेक बहानामा आफूहरुलाई पार्टीबाट निकालेको उनीहरुको दाबी छ ।
ट्रेन्डिङ पोस्ट
टिप्पणीहरू