उम्मेदवारी अघि राजीनामा दिनुपर्ने प्रावधानविरुद्धको मुद्दा हेर्न भ्याइएन

स्थानीय तहका उम्मेदवार बन्न राजीनामा दिनैपर्ने प्रावधानविरुद्ध सर्वोच्च अदालतमा दायर भएको रिटको आज सुनुवाई नहुने भएको छ । गत मंगलबार न्यायाधीश बमकुमार श्रेष्ठको एकल इजलासले अन्तरिम आदेश जारी गर्नुपर्ने वा नपर्ने विषयमा छलफल गर्न आज दुवै पक्षलाई बोलाउने आदेश दिएको हो ।

त्यति बेलासम्मका लागि जनप्रतिनिधिले राजीनामा दिनैपर्ने बुँदा कार्यान्वयन नगर्न अल्पकालीन अन्तरिम आदेश दिइएको सो मुद्दामा आज हेर्न नभ्याइने भन्दै पेसी सारिएको हो । निर्वाचन आयोगले चैत्र पहिलो साता जारी गरेको स्थानीय तह निर्वाचन आचारसंहिताको बुँदा नम्बर ३६ मा उम्मेदवार बन्नका लागि जनप्रतिनिधिले अनिवार्य राजीनामा दिनुपर्ने प्रावधान राखिएको छ ।सो प्रावधानविरुद्ध सिन्धुपाल्चोकको हेलम्बु गाउँपालिकाका अध्यक्ष निमा ग्याल्जेन शेर्पाले सर्वोच्चमा रिट दायर गरेका थिए । उक्त रिटको प्रारम्भिक सुनुवाई गर्दै गत मंगलबार न्यायधीश वमकुमार श्रेष्ठको एकल इजलासले आजका लागि दुवै पक्षलाई बोलाउने आदेश दिएको छ ।

आज सो मुद्दा सर्वाेच्चका ८ नम्बरको इजलासमा न्यायधीशद्वय प्रकाशमान सिंह राउत र कुमार चुडालको संयुक्त बेञ्चमा सुनुवाईका लागि तोकिएको थियो । पेशी सूचीअनुसार, १६ नम्बरमा सुनुवाइका लागि तोकिएको सो मुद्दा हेर्न नभ्याएको कारण आजका लागि सुनुवाई सरेको छ । अब दुवै पक्षलाइ चैत २१ गते साेमबार बाेलाइएकाे छ ।

आयोगले आगामी वैशाख ३० गतेको स्थानीय तहको निर्वाचनमा उम्मेदवर बन्नका लागि हाल बहालरत जनप्रतिनिधिहरुले स्थानीय तहको चुनावमा उम्मेदवारको मनोनयन दर्ता गर्नुअघि पदबाट राजीनामा दिनुपर्ने प्रावधानविरुद्ध शेर्पा सर्वोच्च पुगेका हुन ।