अमेरिकी सेना पैसा लिएर फर्किएपछि अफगानिस्तानमा खाद्य संकट चुलियो

एक समय पर्यटकहरूको लागि अतिलोकप्रिय गन्तव्यको रुपमा रहेको अफगानिस्तानको मध्यक्षेत्रको रमणीय बामियान प्रान्त अहिले सुनसान छ । गरिबीले अतिनै ग्रस्त यो क्षेत्रका किशोर किशोरीदेखि बृद्धबृद्धा सबैले जीवनयापनको लागि काममा लाग्नु पर्ने अवस्था छ । बामियान प्रान्त एउटा यस्तो प्रान्त हो जहाँ अहिलेपनि धेरै जनता ओडार तथा गुफामा बस्ने गरेका छन् ।

६० बर्षका बृद्ध हबिबुल्लाह भन्छन् “म दैनिक ज्यालादारीमा काम गर्ने साधारण मजदूर हुँ तरपनि हरेक दिन मैले काम पाउदिन र यो सब यहाँको खराब र कमजोर अर्थतन्त्रको कारणले भै रहेको छ । जसका कारण बेरोजगारी एकदम बढेको छ ।’

उनी थप्छन्, ‘म मुश्किलले प्रतिदिन १५० देखि २०० अफगानी (लगभग २ अमेरिकी डलर) कमाउन सक्छु तर महंगीले गर्दा हामीजस्तो जनतालाई मँझधारमा पारेको छ ।’ बामियान पनि अघिल्लो वर्ष अफगानिस्तानका अन्य प्रान्तहरू जस्तै अमेरिकी नेतृत्वको सेना फिर्ता भएदेखिनै गरिबीको चपेटामा परेको हो ।अफगानिस्तानको यो आर्थिक मन्दी अनि गरिबीको प्रमुख कारण अमेरिकी सेना फिर्ता भएपछि त्यहाँको केन्द्रीय बैंकको लगभग १० बिलियन डलरको सम्पत्ति अमेरिकाद्वारा फ्रिज गरिलाई मानिएको छ । अमेरिकी राष्ट्रपति जो बाइडेनले सो सम्पत्तिमध्येबाट ७ बिलियन डलर समानरूपमा ९/११ को पीडित परिवार र अफगानिस्तानका लागि मानवीय सहायताको रूपमा विभाजन गर्नुले पनि आर्थिक मन्दी र गरिवी बढेको चिनियाँ समाचार संस्था सिन्ह्वाले जनाएको छ । यो निर्णयको त्यतिबेलै व्यापक निन्दा गरिएको थियो ।

विभिन्न मानविय तथा सहायता एजेन्सीहरुको रिपोर्ट अनुसार युद्धग्रस्त अफगानिस्तानको लगभग ३ करोड ५० लाख जनसंख्यामध्ये २ करोड २० लाखभन्दा बढी जनसंख्याले अहिले तीव्र खाद्य अभावको सामना गरिरहेको र यसले देशमा भयङ्कर मानवीय विपत्ति निम्तिनसक्ने समाचारमा उल्लेख गरिएको छ ।‘अफगानिस्तानमा अमेरिकी नेतृत्वको सेनाको उपस्थिति रहेको बेला बामियान आएका विदेशीहरूले पैसा आफ्नो देशमा फिर्ता लिएर गएको कारणले पनि बजारमा खाद्यान्नको मूल्य बढेको छ र गरिबहरूसँग खाना किन्न पैसा नभएको हो’, हबिबुल्लाह पनि त्यहि भन्छन् ।

श्रोत: सिन्ह्वा