टोलटोलमा चुनावी चहलपहल,गाउँ केन्द्रित बन्दै नेता,कार्यकर्ता

यतिबेला टोलटोलमा चुनावी चहलपहल शुरु भएको छ । नेताहरू गाउँ पस्न थालेका छन् । जिल्ला बाहिर रहेका दलका नेता, कार्यकर्ताहरू जिल्ला केन्द्रित भएका छन् ।

प्रमुख पार्टीका प्रभावशाली नेताहरू पनि जिल्ला केन्द्रित भइरहेका छन् । पालिका र वडास्तरमा समेत चुनाव लक्षित सभा सम्मेलन गरिरहेका छन् । धादिङमा नेपाली काङ्ग्रेस,नेकपा एमाले,माओवादी केन्द्र,नेकपा एकीकृत समाजवादी,राष्ट्रिय प्रजातन्त्र पार्टीलगायतका दलहरु निर्वाचनमा जुटिसकेका छन् । जिल्लाको प्रशासनिक निकाय निर्वाचनको तयारीमा जुट्दै गर्दा राजनीतिक दलहरु पनि माहोल आफ्नो पक्षमा लिन वडा स्तरसम्म खटिएका हुन् ।नेपाली कांग्रेसले ‘घरघर जाऔं, कांग्रेस जिताऔं’ अभियानलाई तीव्र पारेको छ । २०७४ को निर्वाचनबाट विजयी भएर आएका जनप्रतिनिधिहरुले खेलेको भूमिकाको समीक्षा गर्दै ग्रामीण भेगका जनताको बीचमा चुनावी दरदैलो गरिरहेको नेपाली कांग्रेस धादिङका सभापति रामनाथ अधिकारीले बताए ।

“मतदाता भने २०७४ को चुनावमा भन्दा यो पटक निकै सजग देखिएका छन् । राजनीतिक खिचातानीकै कारण पाउने सुविधाबाट बञ्चित भएकाहरु पार्टी भन्दा पनि व्यक्ति छान्ने अभियानमा देखिन्छन् ।”

नेकपा एमालेले चुनाव लक्षित प्रशिक्षण र कार्यकर्ता भेलालाई तीब्रता दिइरहेको छ । नेकपा एमालेले चैत ४ गते महासचिव शंकर पोखरेललाई धादिङ ल्याएर कार्यकर्ता प्रशिक्षण गराएको छ । पछिल्लो महिनामा मात्रै बागमती प्रदेश प्रमुख केशव पाण्डे, नेताहरु पुष्प कँडेल,खेम लोहनीलगायतले जिल्लाका ठाउँ ठाउँमा कार्यकर्ता भेला र प्रशिक्षण कार्यक्रम गरेका छन् । एमालेले तीनै तहका सरकारको नेतृत्व गर्दा गरेका उपलब्धिलाई महत्वका साथ प्रचार गरेर मतदाताहरुसम्म पुगिरहेको एमाले धादिङका जिल्ला कमिटी सदस्य भरत ढुंगानाले बताए ।एमालेबाट विभाजित नेकपा एकीकृत समाजवादीले पनि गल्छी, धुनिबेसीलगायत पालिकाहरुमा अध्यक्ष माधव नेपाललाई नै ल्याएर चुनावी माहोल तताएको छ । फागुन २८ गते गल्छी आएका नेपाल पुनः धुनिबेशी नगरपालिकाको नगर अधिवेशनलाई सम्बोधन गर्न चैत ५ गते आएका थिए । निर्वाचन गतिविधिसङ्गै आन्तरिक संगठन बनाउने कसरत पनि चलिरहेकै छ । स्थानीय तहहरुको भेला र कमिटी गठन कार्य भइरहेको एकीकृत समाजवादी धादिङका सचिव सुवाष खतिवडाले बताए ।

नेकपा माओवादी र राप्रपाका नेता कार्यकर्ता पनि आफ्नो पार्टीको प्रभाव जमाउने गरी ‘चुनावी मिसन’ बनाएर गाउँ पस्न थालेका छन् । यी दुबै पार्टीले निर्वाचन केन्द्रित प्रशिक्षणका कार्यक्रमहरु सञ्चालन गरेर कार्यकर्ताको टोलटोल घरघरमा गैरहेका छन् ।

नेता,कार्यकर्ताको गाउँ प्रवेशसँगै सम्भावित चुनावी परिदृष्यको बारेमा चोक चौतारा,चियापसल र मेलापातमा छलफल हुन थालेको छ । स्थानीय तहको ५ वर्षको कार्यकालको समीक्षा र आगामी नेतृत्वको विषयको चर्चा हुन थालेको छ । स्थानीय मतदाताहरु गाउँटोलको विकासमा अग्रसरलाई उम्मेदवार बन्न उत्प्रेरित गरिरहेका छन् भने नेता कार्यकर्ताहरु पार्टीमा गरेको योगदान,जनाधार मूल्यांकन, कार्यक्षमतालाई प्राथमिकतामा राखेर टिकट दिनुपर्ने तर्क गर्छन् ।धादिङको २ वटा नगरपालिका र ११ वटा गाउँपालिका १३ वटै स्थानीय तहलाई चुनावी अभियानले ढपक्कै ढाक्न थालेको छ । गाउँमा २०७४ सालको स्थानीय तहको निर्वाचनताका भन्दा अहिलेको राजनीतिक परिस्थिति फेरिएको छ । दलका कार्यकर्ताहरू मत आफ्नो पक्षमा तान्न अघिल्लो चुनावमा भन्दा बढी सक्रिय देखिएका छन् । नेतृत्वका आकांक्षीले पार्टीका नेताहरूसँग लबिङ थालेका छन् ।

पुरानै अनुहारहरु आकांक्षी देखिएको स्थानीय तहमा यसअघि गरेका उपलब्धीहरुलाई महत्वका साथ प्रचार गर्दै मतदाता आकर्षित गर्ने योजना सुनाउन थालेका छन् भने नयाँ आकांक्षीहरु यसअघि चुनाव जितेकोले भन्दा अझ राम्रो गर्ने र विकासको बत्ति पाल्ने योजना अघि सार्दै गाउँ छिरेका छन् ।

मतदाता भने २०७४ को चुनावमा भन्दा यो पटक निकै सजग देखिएका छन् । राजनीतिक खिचातानीकै कारण पाउने सुविधाबाट बञ्चित भएकाहरु पार्टी भन्दा पनि व्यक्ति छान्ने अभियानमा देखिन्छन् । पार्टीमा त्याग र जनताको हितमा काम गर्नेलाई स्थानीय तहको निर्वाचनमा प्राथमिकता दिने नेकपा माओवादी केन्द्रका अध्यक्ष मनराज भण्डारीले बताए ।