सानेपा घेर्न पोखराका काँग्रेसी काठमाडौँ आए

गठबन्धन गरेर चुनावमा जाँदा पोखरा महानगरको प्रमुख पद गुम्ने खतरा देखेपछि कास्की काँग्रेसका नेताहरू पार्टी नेतृत्वलाई दबाब दिन काठमाडौं आइपुगेका छन् । पोखराको मेयर आफैंले पाउनुपर्ने मागसहित केन्द्रीय नेताहरुलाई खबरदारी गर्न काँग्रेसको टोली पोखराबाट काठमाडौं झरेको हो ।

सभापति शेरबहादुर देउवासहित शीर्ष नेतालाई भोलि भेटेर पोखराको जनमतबारे स्पष्ट पार्ने टोलीको तयारी छ । ‘अहिलेसम्म निर्णय भएको छैन । काँग्रेसबाहेक अरुले जित्न सक्दैन भन्ने स्थापित गराउन हामी काठमाडौं पुगेका हौं,’ कास्की सभापति किशोरदत्त बरालले भने, ‘जिल्लामा कसैले पनि मेयर छोड्न मान्दैनन् । अरुलाई दिएर चुनाव जित्न पनि सकिँदैन ।’

डेढदेखि दुई सय जना नेता–कार्यकर्ताले केन्द्रीय कार्यालय घेराउ गर्ने सचिव भानु ढकालले बताए । ‘गठबन्धन गर्ने निर्णय ठिकै छ । तर, जनतमतको आधारमा केन्द्रीय समितिले महानगर विभाजन गर्न लागेपछि त्यसको विरोध गरेको हो । जनमतको आधारमा विभाजन हुनुपर्छ,’ उनले भने, ‘हामी मेयर छाडेर जान सक्ने अवस्थामा छैनौं । डालाको चामल मानामा खन्याउँदा पोखिन्छ । मानोको चामल डालोमा हाल्दा ठीक हुन्छ । पोखरामा काँग्रेस डालो हो, अरु माना हुन् ।’

उपमेयर भने गठबन्धनका कुनै दललाई दिन सकिने उनीहरूको सुझाव छ । केन्द्रीय गठबन्धनका नेताहरूको धारणाअनुसार पोखरा एकीकृत समाजवादीको भागमा पर्नसक्ने संकेत छ । यद्यपि, यसबारे अझै निर्णय भने भइसकेको छैन ।

अघिल्लो निर्वाचनमा नेपाली काँग्रेसका उम्मेदवार करिब १४ हजार मतान्तरले एमालेसँग हारेका थिए । तर, अहिले एमाले फुटेकाले काँग्रेस एक्लैले पनि जित्ने सकिने दाबी पोखरेली काँग्रेसहरुको छ । यसअघि भरतपुरको मेयर दाबी गर्न चितवन काँग्रेसको टोली पनि यसैगरी काठमाडौं आएको थियो ।