काठमाडौंकी उपमेयर उम्मेदवार सुनिता महानगरकै ‘वैतनिक विज्ञ’

काठमाडौं महानगरपालिकामा एमालेको तर्फबाट उपमेयरमा उठेकी पूर्व मीस नेवाः सुनिता डंगोल महानगरकै पूर्व कर्मचारी रहेको पुष्टि भएको छ । मै हुँ भन्ने कमरेडहरुलाई पाखा लगाएर एकाएक एमाले अध्यक्ष केपी शर्मा ओलीले उनलाई उपमेयरमा उठाउनुको कारण खोतल्दै सामाजिक सञ्जालमा धेरैले विभिन्न कुरा लेखेका छन् । धेरैजसोले यसअघि महानगरबाट मासिक तलब बुझ्ने विज्ञ रहेको कारण सुनिताको सट्टा अरुलाई टिकट नदिइएको विवरण पनि लेखेका छन् ।

एक जना सामाजिक सञ्जाल प्रयोगकर्ताले लेखेका छन्, ‘यी सुनिता डंगोल काठमाडौं महानगरपालिकालाई कसरी समृद्ध बनाउने भन्ने विज्ञ सल्लाहकार रहिछन् । विगत पाँच वर्षदेखि महिनाको ८० हजार तलब बुझ्दि रहिछन् महानगरपालिकाबाट । विगत पाँच वर्षमा विद्या सुन्दरले समृद्ध काठमाडौंको निर्माण गरेको पनि यिनकै सल्लाहले रहेछ । त्यही भएर एमालेले अहिले उपमेयरको टिकट दिएको रहेछ ।’

विज्ञलाई ७० हजार र सहायक विज्ञलाई ४० हजारको हाराहारीमा तलब दिने व्यवस्था रहेकाले उनले पनि त्यही रकम बुझेकी हुन् ।

यसबारे महानगरपालिकाको उच्च स्रोतले उक्त लेखाइमा आंशिक सत्यता रहेको बतायो । स्रोत भन्छ, ‘सुनिता कर्मचारी होइनन् । सहायक विज्ञ थिइन् । अहिलेका मेयर शाक्यले उनलाई प्रारम्भदेखि नै सहायक विज्ञमा नियुक्त गरेका हुन् ।’

तर उनको नियुक्ति महानगरअन्तर्गतको शहरी योजना आयोगमा भएको हो । थापाथलीस्थित उक्त कार्यालयमा विज्ञ र सहायक विज्ञ गरी १० जनाको टिम राख्ने व्यवस्था छ । उक्त टिमले मेयर कार्यकालमा रहुञ्जेल काम गर्ने अधिकार पाउँछ ।

सहायक विज्ञ सुनिताले अढाई वर्ष मात्र काम गरेको स्रोतले पुष्टि गरेको छ । विज्ञलाई ७० हजार र सहायक विज्ञलाई ४० हजारको हाराहारीमा तलब दिने व्यवस्था रहेकाले उनले पनि त्यही रकम बुझेकी हुन् । उनलाई जनसम्पर्क तथा भाषा विज्ञको रुपमा नियुक्त गरिएको पनि स्रोतले पुष्टि गरेको छ ।

डंगोल नेपाली,नेपाल भाषा र अंग्रेजीमा पोख्त रहेको बताइएको छ । महानगरमा पत्राचारको क्रममा आवश्यक पर्ने भाषाको निम्ति उनलाई छनौट गरिएको एक जना अधिकृतले बताए ।