गठबन्धनको निर्णय पालना नगर्नेलाई सम्बन्धित दलले कारबाही गर्ने

पाँच दलीय गठबन्धनको आज बसेको बैठकमा निर्णय कार्यान्वयन नगर्ने बागी उम्मेदवारहरलाई सम्बन्धित दलले कारबाही गर्ने सहमति भएको छ । आज बसेको निर्वाचनका लागि गठबन्धन दलहरुको आन्तरिक तयारी र अनुगमन गर्ने संयन्त्रको बैठकले समझदारीबमोजिम उम्मेदवारी फिर्ता नभएका र हुन नसकेका विषयमा दुई वटा निर्णय गरेको हो ।

जसअनुसार गठबन्धनमा समझदारी भएको तर समझदारी अनुरुप उम्मेदवारी फिर्ता नलिएको तथा फिर्ता लिने समय अपुग भएका स्थानहरुमा समझदारीअनुरुप कार्य गर्न गराउन आ–आफ्ना दलले आ–आफना मातहतका निकायहरुलाई निर्देश गर्ने भनिएको छ ।

त्यसैगरी गठबन्धनको मर्म र भावनाअनुरुप आपसी एकता कायम गर्दै निर्वाचनमा सक्रियतापूर्वक जिम्मेवारी पूरा गर्ने र उक्त निर्णय पालना नगर्नेलाई आ–आफ्ना दलले कारवाही गर्ने निर्णय गरिएको बताइएको छ ।