सुनिता डंगोलले महिलालाई हरेक महिना ‘महिनावारी बिदा’ दिने

नेकपा (एमाले) को तर्फबाट काठमाडौँ महानगरपालिकाकी उपमेयर उम्मेदवार सुनिता डंगोलले आफू निर्वाचित भएमा महिला कर्मचारीलाई हरेक महिना महिनावारी बिदा दिने बताएकी छन् । उनले कार्यस्थलमा महिलाहरु सुरक्षित हुने वातावरण तय गर्ने प्रतिबध्दता जनाउँदै उक्त योजना पस्केकी हुन् ।

आज श्रमिक दिवसको अवसरमा आयोजित कार्यक्रममा बोल्दै डंगोलले महिला कर्मचारीलाई महिनावारीको समय बिदा दिन आवश्यक नीति तथा कार्यक्रम अघि सार्ने उल्लेख गरेकी हुन् ।

उनले भनिन्,‘महिनावारीको पीडा महिलाले बाहेक पुरुषले बुझ्दैनन् । त्यसैले महिला कर्मचारीलाई महिनावारीमा बिदा दिन हामी नीति तथा कार्यक्रम अघि सार्नेछौं ।’ उनले महिनावारीको पीडा महिलाले मात्र बुझ्ने भने पनि महानगरको मेयरमा पुरुष अर्थात केशव स्थापित उठेका छन् । बरु काँग्रेसले सिर्जना सिंहलाई उठाएको छ ।

उनले सोही कार्यक्रममा प्रमुख अतिथि रहनुभएका एमाले अध्यक्ष केपी शर्मा ओलीलाई मख्ख पार्दै मुलुकको निम्ति ओली पुनः प्रधानमन्त्री हुन आवश्यक रहेको बताइन् । तर महिलाको पीडा महिलाले मात्र बुझ्ने पुरुषले बुझ्दैनन् भन्ने उपमेयरकी उम्मेदवार सुनिताले मेयरमा उठेका एमालेका स्थापित र प्रधानमन्त्री प्रस्ताव गरेकी ओली महिला नभएकोतर्फ भने ध्यान नदिएको प्रष्ट भएको छ ।