खटाइएको ठाउँमा नजाने कर्मचारीलाई आयोगले नछाड्ने

निर्वाचन आयोग नेपालले वैशाख ३० गते हुने स्थानीय तह निर्वाचनको निर्वाचनमा खटिने सम्पूर्ण कर्मचारी सम्बन्धित ठाँउमा नगए कारबाही गर्न आयोगले निर्देशन दिएको छ । आयोगले अनिवार्य रूपमा आफू खटिएका ठाउँमा गई आफूलाई तोकिएको जिम्मेवारी पूरा गर्न निर्देशन दिएको हो ।

मतदान अधिकृत, सहायक मतदान अधिकृत, सहायक कर्मचारी र मतगणना कर्मचारीहरूलाई अति जरुरी, मानवीय र संवेदनशील कारण परेको अवस्थामा बाहेक फेरबदल नगर्न आयोगले निर्देशन दिएको हो ।आयोगले आज विज्ञप्ति जारी गर्दै यसबारे जानकारी गराउँदै काममा खटिन इन्कार गरेमा प्रचलित कानुनबमोजिम कडा कारबाही गर्न सबै मुख्य निर्वाचन अधिकृतको कार्यालय र निर्वाचन अधिकृतको कार्यालयलाई आज निर्देशन दिएको छ ।