रवि लामिछानेलाई तुरुन्त समात्न टेकु प्रहरीमा जाहेरी

पूर्वमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेलाई तत्काल पक्राउ गरी उनको राहदानी छानविन प्रक्रिया अघि बढाउन प्रहरीमा निवेदन परेको छ । 

रविविरुध्द सर्वोच्च अदालतमा रिट हालेर उनको सांसद र गृहमन्त्री पद खुस्काइदिएका समाजवादी केन्द्रका नेता युवराज पौडेल (सफल)ले गत मंगलबार जिल्ला प्रहरी परिसर, टेकुमा उजुरी हालेका हुन् । टेकु प्रहरीले दर्ता गरेको उक्त निवेदनमा निष्क्रिय भइसकेको नेपाली नागरिकताका आधारमा राहदानी बनाएका रविलाई पक्राउ गरेर अनुसन्धान अघि बढाउन माग गरिएको छ । 

अमेरिकी नागरिक रहँदै नेपाली राहदानी लिएको प्रमाणित भइसकेकाले बिलम्ब नगरी उनलाई कानुनको दायरामा ल्याउन युवराजको माग छ । अन्यथा,दोषी उम्कन सक्ने निवेदनमा उल्लेख छ । 

लामिछानेले प्रचलित राहदानी ऐन, २०२४ र हाल प्रचलित राहदानी ऐन, २०७६ मा उल्लेखित झूठा विवरण दिई राहदानी वा यात्रा अनुमतिपत्र लिएको खुलस्त भइसकेको उनले बताएका छन् । राहदानी दुरुपयोगसम्बन्धी फौजदारी कसूरमा जाहेरी दर्ता भइसकेकाले मुलुकी फौजदारी कार्यविधि (संहिता) ऐन, २०७४ को दफा (६) प्रमाण लोप वा नाश हुन नदिने र कसूर गर्ने व्यक्ति उम्कन नपाउने व्यवस्था रहेको पनि उनले स्मरण गराएका छन् । 

त्यस्तै, सोही संहिताको दफा (९) मा कसूरसंग सम्बन्धित व्यक्तिलाई पक्राउ गर्न सकिने र दफाको खण्डको (१) मा कसूरसंग सम्बन्धित कुनै व्यक्ति फेला परेमा वा कसूर गर्दागर्दैको अवस्था रहेमा निजलाई प्रहरी वा अनुसन्धान अधिकारीले पक्राउ गर्ने व्यवस्था छ । त्यसका लागि पहिचान खुल्ने विवरणसहित निवेदन दिनुपर्ने प्रावधान रहेकाले उनी प्रमाणसहित प्रहरी परिसर गएका हुन् । 

युवराजले कसूरदार रविलाई पक्राउ गरेर अनुसन्धान निचोडमा पुर्याउन भनेका छन् । त्यस्तै, आफ्नो मागबमोजिम अनुसन्धान अघि नबढेमा वा सर्वोच्च अदालतको फैसलाको पूर्णपाठको अपेहलना गरेमा विभागीय कारबाही वा कानुनी उपचारमा जाने उनको चेतावनी छ  । 

रविको राहदानी छनविन गर्न माग राख्दै गत माघ १० गते युवराजले जिल्ला प्रहरी परिसर, काठमाडौंमा जाहेरी दिएका थिए । तर, प्रहरीले जाहेरी लिन नमानेपछि उनले जिल्ला सरकारी वकिल कार्यालय, काठमाडौंमा निवेदन दर्ता गराएका थिए ।