हाकिम दाहिने भएपछि अरुको केही लाग्दैन भन्ने उखान गुप्तचर अर्थात राष्ट्रिय अनुसन्धान विभागमा लागू भएको छ । विभागीय प्रमुख हुतराज थापाका एकपछि अर्को अचम्मलाग्दा निर्णयबारे गत साता बालकोटमा राम्रै चर्चा भएको थियो ।
हवल्दार पवित्रा केसीको दरबन्दी रोल्पामा छ । तर उनले डेढ वर्षदेखि राजधानीमा बसेर तलब भत्ता बुझेको देखिन्छ । असन्तुष्ट कर्मचारीहरु भन्छन्, ‘माओवादीको ठूला मान्छेका छोराको साली भन्दैमा त्यसो गर्ने हो भने कामचाहिँ कसले गर्ने ? प्रमुख हुतराजको आशिर्वादमा काठमाडौं बसेर आरामले तलब पकाउन पाइने भएपछि अरुले ज्यान फालेर किन घोट्टिने ?’
उक्त कार्यमा विभागको रोल्पा कार्यालयका हाकिम कुशल थापा मगरले हुतराजलाई साथ दिएका छन् । कुशलले महिना कटेपछि अरुलाई झैँ उनलाई पनि काठमाडौंमा नै तलब पठाउने गरेको बताइन्छ ।
"प्रशासन विभागमा कार्यरत महिला हवल्दार खुसुक्क अष्ट्रेलिया पुगेकी छन् ।"
विभागका एकजना डिएसपीले भने, ‘यो एउटा प्रतिनिधि उदाहरण मात्र हो । यस्ता बेथिति कति छन् कति । प्रधानमन्त्री पुष्पकमल दाहाललाई विश्वासमा लिएकाले अरु कसैले आफ्ना विरुद्ध रौं पनि हल्लाउन नसक्ने भन्दै प्रमुख थापाले कार्यालयका अनौपचारिक बैठकमा सुनाउने गर्दछन् ।’
घनिष्ठताको पराकाष्ठा डिएसपी दिपक केसीसँगको सम्बन्धलाई पनि ठानिएको छ । उनले चिफलाई खानपिनको समयमा ‘अरे यार’ भनेको सुन्नेहरु थुप्रै छन् ।
अनुसन्धानको प्रशासन विभागमा कार्यरत महिला हवल्दार खुसुक्क अष्ट्रेलिया पुगेकी छन् । त्यसलाई पनि थापासँग जोडेर ‘दालमे कुछ काला’ भन्ने हाकिमहरु बग्रेल्ती देखिए ।
