पाथीभरामा भक्तजनले चढाए साढे २० लाख भेटी
![पाथीभरामा भक्तजनले चढाए साढे २० लाख भेटी](https://janaaastha.prixacdn.net/media/albums/pathibhara_bheti_bytquQSlcp.jpg)
मुलुककै प्रसिद्ध तीर्थस्थलमध्येको एक ताप्लेजुङको पाथीभरा मन्दिरमा गत असार महिनामा साढे २० लाख रुपैयाँ भेटी संकलन भएको छ । पाथीभरामा पूजापाठ गर्न पुगेका भक्तजनले भेटीका रुपमा पछिल्लो एक महिनामा उक्त रकम चढाएका हुन् ।
पाथीभरा क्षेत्र विकास समितिका अनुसार असारमा दुई हजार सात सय ५६ जना तीर्थयात्री पाथीभरा पुगेका थिए । उनीहरुले भेटीस्वरुप २० लाख ४४ हजार नौ सय रुपैयाँ चढाएका हुन् ।
संकलित भेटी नेपाल बैंक र एनएमबी बैंकमा जम्मा गरिएको छ । एक महिनामा १२ पटक संकलन गरिएको रकममध्ये दुई पटक एनएमबी बैंकमा र १० पटक नेपाल बैंकमा जम्मा गरिएको हो ।
समितिले मन्दिरको आय हरेक महिना सार्वजनिक गर्ने क्रममा समितिले गत आर्थिक वर्षमा दुई लाख ३१ हजार ३३४ जना दर्शनार्थीले मन्दिर दर्शन गरेको जनाएको छ ।
वि.संं. २०५० सम्म त्यहाँ जाने तीर्थयात्रीको संख्या निकै कम थियो । ताप्लेजुङमा यातायात सुविधा सहज हुन थालेसँगै भक्तजनको संख्या बढेको हो । २०६७–०६८ मा ताप्लेजुङको सुकेटारसम्म कालोपत्रे र भालुगौंडे काफ्लेपाटीसम्म कच्ची सडक बनेको र भालुगौंडे, काफ्लेपाटी, ठूलोफेदीमा होटल सुविधा बढेपछि तीर्थालुहरुको संख्यामा बढोत्तरी आएको पाथीभरा संरक्षण तथा सम्बद्र्धन समितिका सदस्यहरु बताउँछन् ।
यता पाथीभरा क्षेत्र विकास समितिका कार्यकारी निर्देशक प्रजिन हाङ्वाङले पहिलेको तुलनामा सुविधा बढेकाले तीर्थयात्रीहरुको चाप बढेको उल्लेख गरे । उनी भन्छन्, ‘अन्य सुविधामा सुधार ल्याउन सके तीर्थयात्री झन् बढ्ने निश्चित छ ।’
टिप्पणीहरू