बोर्डबाट बिदा भए भुवन, एक दर्जन विदेश भ्रमणबारे मौन
चलचित्र विकास बोर्डका निवर्तमान अध्यक्ष भुवन केसीले आफ्नो कार्यकाल पूर्णरुपमा सफल भएको दावी गरेका छन् । आज बोर्डको अध्यक्षबाट बिदा हुँदै गर्दा उनले दुई वर्षमा गरेका कामकाजको फेहरिस्त सुनाए ।
त्यसक्रममा बोर्डको क्षेत्राधिकार साँघुरो भएको जनाउँदै उनले भने, ‘केही गर्नुपर्छ भनेर म बोर्डको अध्यक्ष बनेँ, तर यहाँ आएर थाहा भयो कि विकास बोर्डमा थोरैमात्रै अधिकार रहेछ ।’
केसीले सरकारको आँखामा चलचित्र क्षेत्र अझै नपरेको गुनासो पनि गरे । ‘यस क्षेत्रका लागि सरकारले चाहिँ के गर्यो त ?', भने, 'नेपाली चलचित्र क्षेत्र यहाँसम्म आइपुग्नुमा सरकारको योगदान शून्य छ ।'
केसीले आफ्नो दुई वर्षे कार्यकालमा सिर्जना भएका विवादहरुबारे भने कुनै प्रष्टीकरण दिएनन् । ०७९ असार पहिलो साता बोर्डको अध्यक्ष नियुक्त भएयता उनी अनेक विवादमा मुछिएका छन् ।
पहिलो त, उनको नियुक्ति नै विवादमा पर्यो । बोर्ड अध्यक्ष हुन स्नातक उत्तिर्ण तथा उच्च नैतिक चरित्र हुनुपर्ने प्रावधान छ । तर, केसीको योग्यता भने प्लस टु मात्रै हो ।
त्यस्तै, अभिनेत्री साम्राज्ञी राज्यलक्ष्मी शाहमाथि चलचित्र ‘ड्रिम्स’को छायांकनको क्रममा यौन दुव्र्यवहार गरेको आरोप केसीमाथि लागेको थियो । यसैलाई लिएर उनको नियुक्तिविरुद्ध सर्वोच्चमा रिटसमेत परेको थियो ।
त्यस्तै, चलचित्रहरुको बक्स अफिस कलेक्शन, सेन्सर, चलचित्र क्षेत्रको नाम चयन, विदेशमा हुने महोत्सव र अनावश्यक बजेट विनियोजन गरेको भन्दै केसी चर्को आलोचनामा परेका थिए । प्रेमिका जिया केसीसँग कार्यकक्षमै रोमान्स गरेको, सरकारी गाडी दुरुपयोग लगायतका विषयमा उनी विवादमा तानिए । प्रगति विवरण सुनाउँदा विवादका यी विषयमा भने उनी बोलेनन् ।
२४ महिनाको कार्यकालमा केसी १२ पटक अध्यक्षको हैसियतमा विदेश भ्रमणमा गएको विषय पनि विवादमा परेको थियो । अस्ति मंगलबार (साउन ८ गते) कार्यकाल सकिदै गर्दा पनि उनी लण्डनमा थिए । हिजोमात्र नेपाल फर्केका हुन् ।
बाेर्ड अध्यक्षबाट केसी पदमुक्त भएसँगै नयाँ नेतृत्वकाे लागि विभिन्न कलाकारहरूले दाैडधुप गरिरहेका छन् । दिनेश डिसी वा करिष्मा मानन्धरमध्ये एक जनाले नेतृत्व हात पार्न सक्ने सिनेवृतमा चर्चा छ । यी दुवै जना एमालेनिकट मानिन्छन् ।
टिप्पणीहरू