भ्रातृ संगठनहरुको अधिवेशन रोक्न काँग्रेसको निर्देशन

नेपाली काँग्रेसले भ्रातृ संगठन तथा शुभेच्छुक संस्थाहरूलाई तत्कालका लागि महाधिवेशन स्थगित गर्न निर्देशन दिएको छ । निर्वाचनमा पार्टी र गठबन्धनका उम्मेदवारलाई विजयी गराउन सबैको भूमिका आवश्यक हुने भन्दै काँग्रेस केन्द्रीय कार्यालयले पूर्वनिर्धारित महाधिवेशन स्थगित गर्न भनेको हो ।

आज पार्टीका मुख्यसचिव कृष्णप्रसाद पौडेलद्वारा जारी विज्ञप्तिमा चुनावमा पार्टी र गठबन्धनका उम्मेदवारलाई विजयी गराउन सबै भ्रातृ संघहरू, शुभेच्छुक संस्थाहरू लगायत विदेशस्थित जनसम्पर्क समितिहरू समेत क्रियाशील रहेकाले हाललाई पूर्वनिर्धारित महाधिवेशन स्थगित गर्न भनिएको छ ।स्थानीय तह निर्वाचनको अन्तिम परिणाम प्राप्त भएलगत्तै आ–आफ्नो कार्यसमितिको बैठक बसी अधिवेशन र महाधिवेशनको कार्यतालिका यथाशीघ्र तय गर्न पनि काँग्रेसले निर्देशन दिएको छ ।

पार्टीका र गठबन्धनमा रहेका दलसँग तालमेल गरिएका उम्मेदवारलाई चुनावमा जिताउन सक्रिय रहन भ्रातृ संघ एवं शुभेच्छुक संस्थाहरूलाई काँग्रेसको आग्रह छ ।