सन्दिपको मुद्धामा आज पनि सुनुवाई रोकियो

उमेर नपुगेकी किशोरी बलात्कारको आरोपमा आफूलाई थुनामा पठाउने जिल्ला अदालत काठमाडौँको आदेशविरुद्ध क्रिकेटर सन्दिप लामिछानेले गरेको पुनरावेदनउपर आज तोकिएको सुनुवाई स्थगित भएको छ । 

पाटन उच्च अदालतमा दर्ता भएको पुनरावेदनको सुनुवाइका लागि यसअघि दुई पटक पेशी तोकिए पनि स्थगित भएको थियो । पहिलोचोटी सन्दिपका कानुन व्यवसायीले स्थगित गराएका थिए भने दोस्रोपटक हेर्न नभ्याइनेमा परेको थियो ।

बलात्कार आरोपमा गत असोज २० गते पक्राउ परेका सन्दिपलाई काठमाडौं जिल्ला अदालतले मुद्धाको अन्तिम किनारा नलागेसम्मका लागि थुनामा पठाउने आदेश गरेको थियो । त्यसविरुद्ध सन्दिपले थुनाबाहिर रहेर मुद्दा लड्न पाउनुपर्ने माग गर्दै पुनरावेदन गरेका हुन् ।

केन्द्रीय कारागारमा रहेका सन्दिप पछिल्लो समय डिप्रेसनको शिकार भएको बताइएको छ ।