अमेरिकी कँग्रेसलाई सम्बोधन गरेपछि भारतीय प्रधानमन्त्रीलाई रात्रिभोज

भारतीय प्रधानमन्त्री नरेन्द्र मोदीले जुन २२ का दिन अमेरिकी संसद कँग्रेसको संयुक्त बैठकलाई सम्बोधन गर्ने कार्यक्रम तय भएको छ । सोही दिन राष्ट्रपति जो बाइडेनले ह्वाइट हाउसमा राजकीय रात्रिभोज आयोजना गर्ने कार्यक्रम छ ।

भारतीय प्रधानमन्त्री जुन २१ देखि २४ तारिखसम्म अमेरिकाको राजकीय भ्रमणमा जाँदैछन् । विदेश मन्त्रालयका अनुसार मोदीले अमेरिकी कँग्रेसको संयुक्त बैठकलाई यसअघि सन् २०१६ मा पनि सम्बोधन गरेका थिए ।

त्यतिबेलाको सम्बोधनमा मोदीले अमेरिकी संसद भवन रहेको क्यापिटोल हिललाई ‘टेम्पल अफ डेमोक्रेसी’ को संज्ञा दिएका थिए । उनले सम्बोधनका क्रममा अमेरिकी राष्ट्रपति अब्राहम लिंकनका विभिन्न उद्गार र शब्द उल्लेख गर्दै भनेका थिए, ‘व्यक्तिगत स्वतन्त्रता र मानवीय समानता समाज विकासको मुख्य चुरो हो ।’