स्टन्टबाजी गर्नेहरुसँग थप तिक्तता बढाउनु छैन : प्रधानमन्त्री
प्रधानमन्त्री तथा एमाले अध्यक्ष केपी शर्मा ओलीले अरुले झैँ आफूले राजनीतिक स्टन्टबाजी नगर्ने बताउनुभएको छ । उहाँले त्यस्ता स्टन्टबाजी गर्नेहरुलाई संयमको आग्रह गर्दै तिक्तता नबढाउन आफूले जवाफ नदिएको उल्लेख गर्नुभएको छ ।
हिजो बेलुकी ज्ञापन पत्र बुझाउन गएका पाँच विपक्षी दलका नेताहरुसँगको भेटमा उहाँले उक्त धारणा राख्नुभएको प्रधानमन्त्रीका राजनीतिक सल्लाहकार विष्णु रिमालले जानकारी दिनुभएको छ । माओवादी अध्यक्ष तथा पूर्व प्रधानमन्त्री पुष्पकमल दाहाल प्रचण्ड, एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपाललगायतसँगको संवादमा उहाँले उक्त धारणा राख्नुभएको रिमालको भनाई छ ।
हिजो बेलुकीको सम्वाद भन्दै रिमाललले सामाजिक सञ्जालमा लेख्नुभएको छ :
विपक्ष : पूर्व उपप्रधानमन्त्री एवं गृहमन्त्री रवि लामिछानेको गिरफ्तारी प्रतिशोध हो ?
प्रधानमन्त्रीः मलाई कुनै प्रतिशोधको राजनीति गर्नु छैन । मेरो कसैसँग दुराभाव छैन । मलाई केही लिनु दिनु छैन । मैले त व्यक्ति तोकेर संसदीय छानबिन समिति गठन नगरौँ भनेको थिएँ। अरु दल र स्वयं रविजीले गठन गरौँ भनेपछि समिति गठन भयो । समितिको प्रतिवेदन आएपछि कार्यान्वयन गर्नु सरकारको दायित्व हो ।
विपक्षः पूर्वाग्रह, तानाशाही ?
प्रधानमन्त्रीः अहिले कतिपय ठाउँमा मलाई “तानाशाह” भनेर अवाञ्छित गालीगलौज गरिएको छ । थप तिक्तता नहोस् भनेर मैले कुनै जवाफ दिएको छैन । मलाई कुनै स्टन्टबाजी गर्नु छैन । साथीहरुले पनि त्यसो गर्नु राम्रो होइन ।
विपक्षः राजनीतिक दलसम्बन्धी अध्यादेश ?
प्रधानमन्त्रीः विगतमा नेकपा (एमाले)लाई विभाजन गर्न अध्यादेश ल्याइएकाले साथीहरुलाई त्यसै गर्न लाग्यो कि भन्ने परेको हुन सक्छ । तर अहिले कुनै पार्टी फुटाएर एमालेमा मिलाउने हाम्रो योजना छैन ।
विपक्षः विपद र राहतको विषय ?
प्रधानमन्त्रीः मनसुनजन्य विपद्को घटनामा घाइते भएकाहरुको निःशुल्क उपचार भइरहेको छ, बेपत्ता भएकाहरुको खोजी कार्य जारी छ, बेलिब्रिजहरुसमेत मगाएर राजमार्गहरुमा भएको अवरोध खुलाइएको छ। यस्ता विषयमा कुनै राजनीति नगरी मिलेर जान मेरो आग्रह छ ।
यो पनि...
१. विपक्षीको ज्ञापनमा एमालेले दान लिएको जग्गाको चर्चा
२. बालुवाटार जानुअघि प्रचण्डलाई लाज लाग्नुपर्ने एमाले नेताको टिप्पणी
ट्रेन्डिङ पोस्ट
टिप्पणीहरू