दुर्गा प्रसाईंका कारण तितरबितर भएकाहरु राप्रपासँग जुट्दै

राष्ट्रिय प्रजातन्त्र पार्टी (राप्रपा)ले आगामी मंगलबार काठमाडौँमा गर्न लागेको व्यवस्थाविरोधी प्रदर्शनमा ‘राजसंस्था पुनर्स्थापनाका लागि संयुक्त जनआन्दोलन समिति’ पनि सामेल हुने भएको छ । 

चैत १५ को प्रदर्शनपछि सुस्ताएको उक्त समितिका तर्फबाट जगमान गुरुङले वक्तव्य सार्वजनिक गर्दै राप्रपाको कार्यक्रममा समर्थन जनाएका हुन् । उनले प्रदर्शनमा राष्ट्रिय झन्डासहित उपस्थित हुन आह्वानसमेत गरेका छन् । 

राजेन्द्र लिङ्गदेन नेतृत्वको राप्रपाले मंगलबार भृकुटीमण्डपमा 'अवस्था बदल्न, व्यवस्था बदलौँ' भन्दै आमसभा गर्दैछ । उक्त कार्यक्रममा अन्य राजावादीहरुको पनि उपस्थिति रहने बताइएको छ । 

अन्तिम राजा ज्ञानेन्द्र शाहलाई गद्दीमा फर्काउन तयार भएका तर विभिन्न समूहमा छरिएर रहेका राजावादीहरु एकले अर्काको कार्यक्रमलाई खुलेर सहयोग गरिरहेका छैनन् । चैत १५ को प्रदर्शनलाई समर्थन गर्ने कि नगर्ने भन्नेमा राप्रपामा पनि विवाद थियो ।  

ज्ञानेन्द्रकै चाहनाअनुसार सबै राजावादीलाई एकै ठाउँमा जुटाएर आन्दोलन अघि बढाउन पूर्वपञ्च नवराज सुवेदीको संयोजकत्वमा संयुक्त जनआन्दोलन समिति गठन गरिएको हो । समितिले आन्दोलनको जनकमाण्डर मेडिकल माफिया दुर्गा प्रसाईंलाई तोकेको छ ।  

तर, तीनकुनेको प्रदर्शनलाई हिंसात्मक बनाएर बेपत्ता भएका प्रसाईं अहिलेसम्म भेटिएका छैनन् । समितिका संयोजक सुवेदी घरमै नजरबन्दमा छन् भने आन्दोलन परिचालन समितिका अध्यक्ष धवलशमशेर राणा र समितिको सदस्य सचिव बनाइएका नवराजावादी रविन्द्र मिश्र प्रहरी हिरासतमा छन् । 

सुवेदी नजरबन्दमा परेपछि समितिको नेतृत्व जगमानले पाएका हुन् ।