सामाजिक सुरक्षा कोषको चर्को बिरोध, माछापुच्छ्रे बैंकका सबै कर्मचारी बिरोधमा

सरकारले घोषण गरेको सामाजिक सुरक्षा कोषमा सहभागि नहुने भन्दै अधिकांश बैंकका कर्मचारीले बिरोध गरेका छन् । उनीहरुले सरकारले निजी क्षेत्रका बैंक तथा वित्तीय संस्थाहरुलाई जबर्जस्ती आबद्व गराउन लागेको बिरोधमा विभिन्न कार्यक्रमको आयोजना गरेका छन् ।

सोही क्रममा आज माछापुच्छ्रे बैंकको मुख्य कार्यालय, लाजिम्पाटका सबै कर्मचारीले मुखमा मास्क लगाएर बैंकको मूल ढोका अगाडि धर्ना दिएका छन् । उनीहरुले खाइपाई आएको रकम घट्ने भएकाले आफूहरुले कोषको बिरोध गरेको बताएका छन् ।

विरोधमा उत्रिएका कर्मचारीहरुले भनेका छन् ‘श्रीमान र श्रीमती दुबैजना जागिरे भएको अवस्थामा एउटाले मात्र उपदान वा पेन्सन पाउने अवस्था कोषमा राखिनु, ५८ वर्षमा अवकाश हुने व्यवस्था विपरित ६० वर्षको उमेरपछि मात्र कोषमा जम्मा भएको रकम प्राप्त हुने र जागिरे अवधीमा कसैको निधन भएमा परिवारले आधा मात्रै पेन्सन पाउने व्यवस्था विद्यमान सुविधाको विपरित भएकाले कोषमा आबद्ध हुन सकिँदैन ।’

माछापुच्छ्रे बैंकमा सरकारी कोषको सबैभन्दा चर्को बिरोध हुनुमा बैंकका सीईओ र राष्ट्र बैंकका गभर्नरबीचको पारिवारिक सम्बन्धले काम गरेको बताइन्छ । सरकारी कोषको सबैभन्दा पहिले नियमनकारी निकाय राष्ट्र बैंकमा कार्यान्वयन हुन्छ वा हुँदैन भन्ने विषयलाई आफूहरुले सीईओ मार्फत् गभर्नरलाई सन्देश दिन खोजेको एकजना कर्मचारीले बताएका छन् ।

बिरोधको श्रृंखला अन्य बैंकहरुमा पनि हुन लागेको बताइएको छ । नेपाल राष्ट्र बैंक र सरकार नियन्त्रित नेपाल बैंक, राष्ट्रिय वाणिज्य बैंक र कृषि विकास बैंकमा भने त्यहाँका कर्मचारी युनियनले हालसम्म भौतिक उपस्थितिमा बिरोध गरेका छैनन् । ती बैंकमा रहेका विपक्षी राजनीतिक दलसँग निकट युनियनले विज्ञप्ति निकालेका छन् भने सत्तारुढ एमाले निकट युनियनले कोषको पक्ष वा विपक्षमा एक शव्द पनि बोलेका छैनन् ।