बालुवाटारमा सहमति, पालिकैपिच्छे असहमति

नेपाली काँग्रेसका नेता तथा कार्यकर्ताले सत्ता गठबन्धनका पाँच दलका शीर्ष नेताबीच बालुवाटारमा भएको सहमतिको ठाडो उल्लंघन गरेको भन्दै आज बिहान बालुवाटारमा नेताहरुवीच चर्काचर्की भएको छ ।

स्थानीय तहको निर्वाचनका निम्ति आज भएको उम्मेदवारी मनोनयनमा काँग्रेसले अन्य दललाई छाड्ने सहमति भएका कतिपय नगरपालिका र गाउँपालिकामा बागी उम्मेदवार उठेका छन् ।

त्यसरी बागी उठ्नेमा स्थानीय तहका नेताहरु भएको बताइएको छ । राजधानीसँग जोडिएको काभ्रेपलाञ्चोकको धुलिखेल नगरपालिकामा उम्मेदवारबारे गरिएको सहमति मसी सुक्न नपाउँदै काँग्रेसका नगर सभापतिले उल्लंघन गरेका हुन् । उक्त नगरपालिकाको अध्यक्ष नेकपा एकीकृत समाजवादीको भागमा परेको थियो ।

तर आज दिउँसो काँग्रेस धुलिखेल नगर सभापति बिदुर बस्नेतले एकीकृत समाजवादीका उम्मेदवारको विरुध्दमा बागी उम्मेदवारी हालेका हुन् । यता ललितपुरको महालक्ष्मीस्थान नगरपालिकामा पनि त्यसै गरिएको बताइएको छ । उता, प्युठान, बागलुङलगायतका जिल्लामा पनि काँग्रेसले सहमतिविरुध्द उम्मेदवारी दिएको आरोप छ ।