उर्लँदो भेलमा हेलिएर दुई जनाको ज्यान बचाउने चणिकलाललाई खुमलटारमा सम्मान

नख्खु खोलामा बगेका दुई जनाको उद्धार गर्ने काभ्रेका चणिकलाल तामाङलाई नेकपा माओवादी केन्द्रले सम्मान गरेको छ । 

पूर्वप्रधानमन्त्री तथा सो पार्टीका अध्यक्ष पुष्पकमल दाहाल प्रचण्डले आफ्नै निवास खुमलटार बोलाएर उनलाई सम्मान गरेका हुन् । तामाङले हिजो शनिवार ललितपुर महानगरपालिका-२५ सुगम टोलस्थित नख्खु खोलाले बगाएका रौतहटका ४३ वर्षीय राजु साह र उनकी छोरी ६ वर्षीया मेघनालाई उद्धार गरेर बचाएका थिए । 

टहराको छानामाथि चढेर गुहार मागिरहेका चार जनालाई सरकारी निकायले उद्धार गर्न नसकेपछि उनीहरु टहरासँगै बगेका थिए । खोलाले बगाएर झण्डै पाँच सय मिटर तल पुर्याएपछि तामाङले उर्लदो भेलमा हाम फालेर उद्धार गरेका थिए । दुबै जनाको हाल पाटन अस्पतालमा उपचार भइरहेको छ । 

‘साहसी युवा’ तामाङलाई सम्मान गर्दै प्रचण्डले सरकारले गर्न नसकेको काम गरेर दुई जनालाई नयाँ जीवन दिएकोमा धन्यवाद ज्ञापन गरे । संकटको बेला नै बहादुरहरुको जन्म हुने भन्दै उनले तामाङलाई ‘साहसी युवा’को रुपमा सम्मान गरिएको बताए ।

काभ्रेको तेमाल गाउँपालिका-९ चोकटार घर भएका तामाङ माओवादी केन्द्रनिकट शहीद परिवारका सदस्य हुन् । उनका दाई तत्कालीन जनमुक्ति सेनाका कमाण्डर चन्द्र तामाङ ‘शुक्र’ जनयुद्धका क्रममा सर्लाहीमा मारिएका थिए ।

सो क्रममा तामाङले उद्धार गरेर दुई जनाको जीवन बचाउन पाएकोमा खुशी लागेको बताए। आफू विहान खोला हेर्न आएको बेलामा मान्छे बगेको देखेपछि तत्काल हाम फालेर उद्धारमा लागेको प्रचण्डलाई उनले सुनाए ।