मानव तस्करलाई लाखौँ तिरेर महिनौँको जोखिमपूर्ण यात्रापछि मेक्सिको हुँदै ‘अमेरिका छिर्ने सपना’ बोकेर हिँडेका दर्जनौँ रोल्पाली दुबईमा अलपत्र परेका छन् ।
त्रिभुवन अन्तर्राष्ट्रिय विमानस्थल काठमाडौं र इन्दिरा गान्धी अन्तर्राष्ट्रिय विमानस्थल नयाँ दिल्लीबाट ‘सेटिङ’ मार्फत् दुबई उत्रिएका ५५ जनाभन्दा बढी रोल्पालीहरू दुबईमै अलपत्र रहेको बताइएको छ ।
नेपाली दलाललाई धेरै रकम बुझाएर दुबई गएका उनीहरू ‘ब्राजिल उड्ने दिन’ को ‘सेटिङ’ नमिल्दा खाडीमै अड्किएको महिनौँ भइसकेको छ । ‘तल्लो बाटो’ बाट अमेरिका जान खोजिरहेकाहरू न घर फर्किन सकेका छन्, न अघि बढ्न । दुबई उड्नुअघि लाखौँ रकम उठाएर ‘१५ दिनभित्र ब्राजिल उडाउँछु’ भनेका दलालले तीन महिनादेखि अलपत्र पारेपछि रोल्पाका २५ वर्षीय राजेन्द्र घर फर्किने उपाय खोजिरहेको बताउँछन् ।
‘अमेरिका पठाउने एजेन्टलाई पहिलो चरणमा सात लाख रुपैयाँ दिएर दुबई आएको तीन महिना भइसक्यो । मजस्ता धेरै साथीभाइलाई एजेन्टले यता न उता पारेको छ । हामीहरू घर फर्किने कि यतै बस्ने भन्ने तनावमा छौँ,’ उनले भने ।
अमेरिका जान हिँडेका राजेन्द्रजस्ता दर्जनौँ रोल्पाली युवाहरू दुबईमा छरिएका छन् । आफूहरू दलालको जालोमा जेलिँदा दुबईमै हराइरहेको बताउँछन् रोल्पाका कृष्ण । उनी भदौको अन्तिमतिर दाङका एक मानव तस्करका सहयोगीलाई सात लाख तिरेर भिजिट भिसामा दुबई उडेका थिए ।
मानव तस्कारले ‘रोल्पा र रुकुमबाट अमेरिका जाने सोच’ बनाएका अन्य युवाभन्दा अघि नै मेक्सिको पुर्याउने बताएपछि उनी तीन महिनादेखि दुबईमै छन्।
‘मेरो गाउँका सबै साथीभाइहरू अमेरिका गइरहेका छन् । त्यसपछि मलाई पनि रहर लाग्यो, अमेरिका गइसकेको एकजना साथीको सल्लाहमा दङ्गाली एजेन्टलाई ११ लाख बुझाएर आएको हुँ,’ दुबईमा अलपत्र परेका कृष्णले भने, ‘दलालले त मलाई अरुभन्दा अघि पठाउँछु भनेको थियो । तर अहिलेसम्म पठाउनै सकेको छैन ।’
रोल्पा, रुकुम र दाङका धेरै युवाले ‘अमेरिकी सपना’ बोकेर दिनदिनै गाउँ छाडिरहेका छन् । उनीहरू चर्को मूल्यमा झण्डै ५० देखि ८० लाखसम्म ऋण काढेर ‘दिल्ली, दुबई, टर्की, ब्राजिल’ उड्छन् । तीमध्येका केही युवा कोलम्बिया–पानामाको डरलाग्दो जंगलबाट मेक्सिको सीमापार गरिसके । उनीहरूकाअनुसार कति हिँडिरहेका छन्, कति महिनौँदेखि दुबईमै अल्झिएका छन् ।
‘भिजिट भिसामा यहाँ आएका मेरो गाउँका तीनजना मसितै बसिरहेका छन्,’ दुबईमा रहेका रोल्पाका ललित घर्तीले भने, ‘एजेन्टले उनीहरूबाट धेरै पैसा लगेर दुबईमै राखेको छ । यिनीहरूसँग अब खानेबस्ने पैसा पनि छैन ! पैसा जति सबै एजेन्टले लगेछ, उडाउँदैन पनि । केहीदिन पर्ख–पर्ख मात्रै भन्छ ।’
दुबईस्थित रोल्पा सेवा समाजका एक पदाधिकारीले बताएअनुसार हिजोआज जताततै रोल्पाली भेटिन्छन् । ‘भिजिट भिसा’ मार्फत् दुबई छिरेका उनीहरूले सबैजसोले रूस वा अमेरिका उड्ने बताउने गरेका छन् ।
