सरकारसँग कांग्रेस नेता असन्तुष्ट, सुझाव लिन जिल्ला दौडाह

सत्तारुढ नेपाली कांग्रेसका नेता एनपी साउदले केपी ओली नेतृत्वको सरकारको कार्य सम्पादनप्रति असन्तुष्टि जनाएका छन् । 

सरकार स्थायी भएर विकासका मुद्दामा केन्द्रित हुन नसकेको जनाउँदै उनले सुशासनका सवालमा पनि प्रभावकारिता देखाउन नसकेको बताए । नेपाल प्रेस युनियनले आज नेपालगञ्जमा आयोजना गरेको पत्रकार भेटघाटमा साउदले भने, ‘सरकार स्थायी भएर विकासका मुद्दामा केन्द्रित हुन सकिरहेको छैन, हामीले विकासका प्राथमिकताहरुको निर्धारण गर्न आवआवश्यक छ ।’

सुशासन, भ्रष्टाचार अन्त्य, विकास निर्माण र संविधान संशोधनका मुद्दामा सरकार केन्द्रित हुनुपर्नेमा जोड दिँदै उनले त्यसैका लागि कांग्रेसले साथ दिइरहेको बताए । तर, काम गर्न नसक्दा खबरदारी पनि गर्ने उनले स्पष्ट पारे। 

‘अहिलेको गठबन्धनको सरकारले सुशासन कायम गर्न, भ्रष्टाचारको अन्त्य गर्न, विकास निर्माण र संविधान संशोधनका मुद्दामा केन्द्रित हुनुपर्छ,’ उनले भने, ‘यसका लागि नेपाली कांग्रेसले सहयोग गरिरहेको छ र काम गर्न नसक्दा खबरदारी पनि गरिरहने छौँ।’ 

सरकारका कामहरूको मूल्यांकन विभिन्न तहमा भइरहेको भन्दै पूर्वमन्त्रीसमेत रहेका नेता साउदले उपयुक्त समयमा कांग्रेसले आन्तरिकरुपमा मूल्यांकन गर्ने जानकारी दिए । मुलुकको परिस्थिति र पार्टीलाई चलायमान बनाउन आफूहरू जिल्ला दौडाहमा निस्किएको उनको भनाइ थियो ।

‘सरकार बनाउँदा ७ बुँदे सहमति गरेका छौँ । ६ महिना पुग्न थालेको छ, यस अवधिमा पार्टीका साथीहरु र जनताको राय के छ भनेर बुझ्न आएका छौँ,’ साउदले भने, ‘अहिले सरकारमा नेपाली कांग्रेस पनि सामेल छ । त्यसकारण सरकारले गरेका कामहरूलाई सहयोग गर्ने र जनताको सेवा गर्नका लागि दबाब दिने र खबरदारी गर्ने जिम्मेवारीमा हामी छौँ ।’

संविधान संशोधनको मुद्दामा कांग्रेस प्रतिवद्ध रहेको दोहोर्याउँदै उनले त्यसनिम्ति राष्ट्रिय सहमति जटाउनुपर्नेमा जोड दिए । ‘संविधानका कमिकमजोरी सुधार गर्न आवश्यक छ । संविधान संशोधनका विषयमा कांग्रेस स्पष्ट छ । यसका लागि राष्ट्रिय सहमति कायम गर्नुपर्छ,’ नेता साउदले भने ।