आफ्नै वर्चश्व रहेको काठमाडौँ जिल्ला अदालतमा काँग्रेस एक्लै भिड्ने

नेपाल बार एशोसिएशनको निर्वाचनमा सत्ता गठबन्धनका पाँच दलनिकट कानुन व्यवसायीहरुको संगठन मिलेर ‘क्लिनस्विप’ गरेका वकिलहरू तितरबितर हुन थालेका छन् । केन्द्रीय बारमा मिलेर लडेका उनीहरु तल्ला इकाईहरुमा आ–आफ्नै अनुकूलताअनुसार गठबन्धन गर्न थालेपछि सहकार्य भाँडिएको हो ।

आफू बलियो भएका ठाउँमा गठबन्धन नगर्ने स्वार्थी प्रवृत्ति हावी भएकाले प्रतिनिधिसभा विघटनदेखि सर्वोच्चको आन्दोलनसम्म एकै ठाउँमा रहेका वकिलहरू विभाजित भएका हुन् । यसैबीच काठमाडौँ जिल्ला अदालत बार एशोसियशनको निर्वाचनमा काँग्रेसको नेपाल डेमोक्रेटिक लयर्स एसोसिएसन (डिएलए) ले एक्लै उम्मेदवारी दिएको छ ।

१७ सदस्यीय कार्यसमितिमा डिएलएका तर्फबाट सबै पदमा एकल उम्मेदवारी परेको हो । अधिवक्ता रामचन्द्र पौडेलको नेतृत्वमा चुनावमा जान लागेको डिएलएले उपाध्यक्षमा पुरुषोत्तम अधिकारी र सचिवमा उज्ज्वलराम श्रेष्ठलाई उम्मेदवार उठाएको छ । त्यस्तै, सहसचिवमा अञ्जु रेग्मी अर्याल र कोषाध्यक्षमा सन्तोष भण्डारीको उम्मेवारी परेको छ ।

नयाँ नेतृत्व चयनका लागि भोलि बबरमहलस्थित काठमाडौँ जिल्ला अदालत परिसरमा बिहान ८ बजेदेखि दिउँसो ४ बजेसम्म मतदान हुँदैछ ।

डेमोक्रेटिकहरुको बर्चश्व रहेको काठमाडौँ जिल्ला अदालत बारमा वामपन्थीहरु तुलनात्मक रुपमा कमजोर छन् । त्यहाँ वामपन्थीहरु सबै एकजुट हुँदा पनि डिएलएका उम्मेदवारले सजिलै जित्ने दाबी गरिएको छ । सोही कारण काँग्रेस गठबन्धनको निम्ति इच्छुक नदेखिएको हो ।यसअघि पाटन उच्च अदालत बारको चुनावमा गठबन्धन दल एकीकृत समाजवादी संबद्ध वकिलहरुको संगठन एसपिएलएले एमालेको पिपिएलएसँग तालमेल गरेको थियो ।