सडक व्यापार श्रमिक संगठनकी नेतृलाई सम्मान

नेकपा एकीकृत समाजवादीसँग आवद्ध नेपाल स्वतन्त्र सडक व्यापार श्रमिक संगठनकी नेतृ संगीता कार्की प्रतिनिधिसभामा समानुपातिकतर्फको उम्मेदवारमा सिफारिस भएकी छन् । उनको सिफारिसपछि श्रमिकहरूले आफ्नो आवाज सम्बन्धित निकायसमक्ष पुर्याउन सफलता मिल्ने भन्दै शुभकामना व्यक्त गरेका छन् ।

हिजो इटहरीमा आयोजित अन्तरक्रिया तथा सम्मान कार्यक्रममा नेपाल स्वतन्त्र सडक व्यापार श्रमिक संगठनले कार्कीलाई सम्मान गरिएको छ । लामो समयदेखि इटहरीको साप्ताहिक हटियालाई केन्द्र बनाएर सडक व्यापार गर्दै आएकी कार्की विगत एक वर्षदेखि एकीकृत ट्रेड युनियन महासंघको नेपाल स्वतन्त्र सडक व्यापार श्रमिक संगठनकी केन्द्रीय सदस्य हुन् ।

निडर र अन्यायको विरुद्ध आवाज ओकल्ने खरो स्वभावकी नेतृ संगीताले आगामी दिनमा समानुपातिकबाट संसदमा पुग्न सकेको खण्डमा सम्पूर्ण मजदुर वर्गको प्रतिनिधित्व गर्ने भएकाले सम्पूर्ण मजदुर वर्ग एक भएर लाग्नुपर्ने भनाइ राखेका थिए ।

नेपाल स्वतन्त्र सडक व्यापार श्रमिक संगठनका केन्द्रीय उपमहासचिव प्रदीप तामाङले संगीता एक सच्चा र इमानदार मजदुरको नेतृत्व गर्न सक्ने नेतृ भएकाले सम्पूर्ण मजदुर वर्गले उनलाई आफूहरूको आवाज सुनिदिने ठाउँसम्म पुर्याउन आग्रह गरेका छन् । कार्यक्रममा कृषि मजदुर संगठन, स्वतन्त्र सिटी सफारी संगठन, स्वतन्त्र सडक मजदुर संगठनलगायत प्रतिनिधिहरूले कार्कीलाई सम्मान गर्दै उनीप्रति आफूहरूको समर्थन रहेको बताएका थिए ।

नेपाल स्वतन्त्र सडक व्यापार श्रमिक संगठनका संघीय उपाध्यक्ष कृष्णप्रसाद वस्तीको प्रमुख आतिथ्यमा भएको कार्यक्रममा बोल्दै संगीताले आफूले पहिलेदेखि नै अन्यायको विरुद्ध आवाज ओकल्दै आएको बताइन् । सडक व्यापारी र यातायात मजदुरहरुको समस्या समाधानमा लागिरहने बताउँदै उनले भनिन्, ‘समय समयमा सडक व्यापारीको पक्षमा बोल्दा आफूलाई पैसामा बिक्ने अवसर आयो । तर त्यसलाई अस्वीकार गर्दै यहाँसम्म आएको छु । आफूलाई आज संगठनका साथीहरूले खादा ओढाएको नभई जिम्मेवारीको भारी बोकाएको बोध भएको छ ।’