अमेरिकी राष्ट्रपतिलाई सिध्याएर ह्वाइट हाउस कब्जा गर्ने भारतीय युवकको योजना

अमेरिकी राष्ट्रपति जो वाइडेनको हत्या गर्न खोजेको आरोपमा एक भारतीय युवक पक्राउ परेका छन् । 

बाइडेनलाई मार्ने उद्देश्यका साथ राष्ट्रपति निवास ‘ह्वाइट हाउस’ को पर्खालमा ट्रक ठोक्काएको आरोपमा १९ वर्षीय साईवर्षित कान्डुला समातिएका हुन् । उनले सोमबार राति १० बजे बक्स ट्रक लगेर राष्ट्रपति निवासको भित्तामा ठोक्काएको भारतीय सञ्चार माध्यमहरुले जनाएका छन् ।  

घटनालगत्तै पक्राउ परेका कान्डूलामाथि राष्ट्रपति, उपराष्ट्रपति र उनीहरुको परिवारलाई सिध्याउन खोजेको आरोप लगाइएको छ । भारतीय सञ्चारमाध्यम एमडब्लु न्यूजका अनुसार कट्टरवादी सिद्धान्त बोकेका उनी ह्वाइट हाउसभित्र घुस्न चाहन्थे । तर, कडा सुरक्षाका कारण छिर्न सकिरहेका थिएनन् । त्यसपछि ह्वाइट हाउसभित्र छिर्न ट्रकलाई पर्खालमा ठोक्काएका हुन् ।

उक्त ठक्करबाट कोही पनि घाइते नभएको एमडब्लु न्यूजले जनाएको छ । दुर्घटनापछि उनी ट्रकबाट ओर्लिएर कालो र रातो रङ्गको झण्डा फरफराउँदै चिच्याएका थिए । त्यतिबेला राष्ट्रपति वाइडेन ह्वाइट हाउसको बगैंचामा थिए ।  

राष्ट्रपति वाइडेनलाई मार्न उनी मिजाैरीबाट वासिङटन डिसी आएको पनि समाचारमा उल्लेख छ । प्रहरीको प्रारम्भिक अनुसन्धानमा कान्डुलाले छ महिनादेखि हत्याको योजना बनाएको निष्कर्ष निकालेको छ । 

‘उनी राष्ट्रपतिलाई हटाएर सत्तामा जान चाहन्थे । त्यसैले उनले हत्याको योजना बनाएको देखिन्छ’, त्यहाँको प्रहरीलाई उद्धृत गर्दै समाचारमा जनाइएको छ । प्रहरीका अनुसार उनले ‘डाटा एनालाइसिस’ अध्ययन गरेका छन् । लामो समयदेखि कामको खोजीमा रहेका उनी पढाईमा अब्बल विद्यार्थी भएको खुलेको छ । 

उनी भर्जिनियाको हेरन्डनबाट यु–हौल ट्रक भाडामा लिएका गएका थिए । युहौलबाट ट्रक भाडामा लिन १८ वर्ष पूरा भएको हुनुपर्छ । आफ्नो कम्पनीको ट्रक राष्ट्रपति निवासमा ठोक्किएपछि युहौलले प्रावधानमै टेकेर ट्रक भाडामा दिएको स्पष्टीकरण दिएको छ । 

भारतीय युवकले अमेरिकी राष्ट्रपतिको हत्या गर्न कोशिस गरेको घटनाले यतिबेला अन्तर्राष्ट्रियस्तरमै तहल्का मच्चाएको छ । उक्त घटनाले अन्तर्राष्ट्रिय रुपमा बदनामी भएपछि भारतमा कट्टरताको विरोधमा आवाज उठ्न थालेको छ ।