मोहनविक्रमकी श्रीमती दुर्गालाई सांसद बनाउन सत्तारुढ गठबन्धन सहमत

राष्ट्रपतिले मनोनीत गर्ने राष्ट्रिय सभा सदस्यमा राष्ट्रिय जनमोर्चाकी उपाध्यक्ष दुर्गा पौडेललाई सिफारिस गर्न सत्ता गठबन्धनका दलहरुले सहमति जनाएका छन् ।
 

आज बिहान बसेको गठबन्धनका शीर्ष नेताहरुको बैठकले उनलाई राष्ट्रिय सभामा लैजाने निर्णय गरेको हो । राष्ट्रपतिबाट मनोनीत एकसहित राष्ट्रियसभा २० सदस्यको पदावधि फागुन २० मा सकिँदैछ ।  

नेकपा मसालका महासचिव मोहनविक्रम सिंहकी पत्नीसमेत रहेकी पौडेल गत निर्वाचनमा प्युठानबाट प्रतिनिधिसभा सदस्यमा पराजित भएकी हुन् । गठबन्धनको साझा उम्मेदवार रहेकी उनलाई एमालेका सूर्य थापाले हराएका थिए ।