भारुमा आम्दानी विवरण बुझाउने सांसद नेरुमा मौन

नेपाली काँग्रेसका सांसद तथा विवादास्पद व्यापारी विनोद चौधरीले भारतस्थित वाइवाइ चाउचाउ कम्पनीले सेयर निष्कासन गर्ने जनाएका छन् । उनले आगामी वर्ष २०२५ को सुरुवातदेखि प्रि–आइपिओ फण्ड जारी गर्ने ब्लुम्बर्गसँगको कुराकानीमा बताए ।

त्यसका लागि भारतका विभिन्न नियमनकारी निकायमा सिजी कर्प ग्लोबल,भारतको आर्थिक विवरण बुझाइसकेका छन् । ब्लुम्बर्गका अनुसार भारतीय बजारमा वाइवाइको हिस्सा २८ प्रतिशत पुगेको छ । पछिल्लो समय चौधरीले भारतमा वाइवाइ बेचेर ८ अर्ब भारतीय रुपैयाँ आम्दानी गरेको कागजातमा उल्लेख छ ।

ब्लुमबर्ग टेलिभिजनकी हास्लिन्दा अमिनसँगको हालैको कुराकानीमा उनले त्योबाहेक थप जानकारी दिएका छैनन् । विदेशमा कमाएको सम्पत्ति स्वदेश नल्याई उनले उताको आम्दानी पूर्वी युरोपेली मुलुक र श्रीलंकामा थप लगानी गर्न लागेको पनि समाचारमा जनाइएको छ । 

नेपालको पहिलो र एकमात्र डलर अर्बपति भनिएका चौधरीले विभिन्न मुलुकमा रहेका आफ्नो व्यवसायको खुद आम्दानीबारे नेपाल सरकारलाई हालसम्म जानकारी गराएका छैनन् । विगतमा नबिल बैंकमा गरिएको लगानीबाट प्राप्त लाभांशलाई ढाका हुँदै विदेश पुर्याएका उनले उताको रकम उतै प्रयोग गर्ने गरेका छन् ।

विदेशको हिसाब मिलाउन उनी नियमित रुपमा भारत,श्रीलंका, हङकङ,फिलिपिन्स, सिंगापुर, युएई र अमेरिका जाउआउ गरिरहन्छन् । पछिल्लो पटक असोज १ गते राति सिंगापुर एअरलाइन्सको उडान नम्बर एसक्यु ४४१ मा सिंगापुर गएका उनी त्यसअघि दुबईबाट फर्केका थिए ।

सिंगापुर उड्नुअघि सामाजिक सञ्जालमा फट्याईंका साथ नवलपरासीको सुस्तामा आफ्नो पहलमा बिजुली पुर्याइएको स्टाटस लेखेका थिए । माननीयको आवरणमा चौधरीले गफ दिँदै पोष्ट गरेका छन्, ‘हाम्रो निरन्तरको पहल र सरकारको सहयोगमा सुस्ता गाउँपालिका ५ का करिब ३५० घरधुरीमा अब बिजुली बल्ने निश्चित भएको छ । यो हामी सबैको लागि खुशीको कुरा हो । सोमबार शहरी विकास मन्त्रालयको स्थानीय पूर्वाधार विभाग र विद्युत प्राधिकरणबीच सम्झौता सम्पन्न भएको छ......।’

सरकार र प्राधिकरणको कार्ययोजनाबमोजिम सुस्तामा बत्ति बालिएको अवस्थालाई पनि उनले आफ्नै पहल भन्न भ्याएका छन् । चुनावकै बेला आफूले उक्त ठाउँमा बिजुली ल्याउने प्रतिबद्धता जनाएको पनि लेखेका छन् । आफ्नो व्यवसाय र आम्दानीबाट जनताको नाममा कौडी खर्च नगर्ने चौधरीले सरकारी आयोजनालाई समेत आफ्नै पहलमा भएको भन्न भ्याएका छन् । सामाजिक उत्तरदायित्वअन्तर्गत नबिल बैंकको रकमलाई उनले चौधरी ग्रुपको नाममा खर्च र प्रचार गर्दै आएका छन् । चौधरी ग्रुपकै आम्दानीबाट भने सुको खर्चेको देखिँदैन ।