माओवादीले बाढी पीडितका लागि पैसा उठाउने, प्रवाशबाट पाँच लाख सहयोग

प्रमुख प्रतिपक्ष दल नेकपा माओवादी केन्द्रले बाढीपहिरोको क्षतिसम्बन्धी तथ्यांक संकलन गर्न केन्द्रीय कार्यालयमा हेल्पडेक्स राख्ने भएको छ ।

अध्यक्ष पुष्पकमल दाहाल प्रचण्ड निवास खुमलटारमा आज साँझ बसेको पदाधिकारी बैठकले यो निर्णय गरेको हो । मौसम पूर्वानुमानअनुसार सरकारले जोखिम पहिचान र पूर्वतयारीमा ध्यान नदिएका कारण जनधनको क्षति बढ्न पुगेको माओवादीले निष्कर्ष पनि निकालेको छ । 

बैठकले पार्टी सदस्य र निर्वाचित जनप्रतिनिधिहरूले राहत कोषमा रकम जम्मा गर्ने र पार्टीपंक्तिलाई राहत पुनर्निर्माणमा खटाउने निर्णयसमेत गरेको छ । त्यस्तै, दीर्घकालीन पुनर्स्थापना र पुनर्निर्माणका लागि आवाज उठाउनेलगायतका निर्णय बैठकले गरेको अध्यक्ष प्रचण्डको सचिवालयले जानकारी दिएको छ ।

यता, माओवादी केन्द्रको एसिया संगठन समितिले बाढीपहिरो पीडितका लागि पाँच लाख सहयोग गरेको छ । आज इञ्चार्ज पम्फा भुसाल, सहइञ्चार्ज ओम शर्मा र कार्यालय मुख्य सचिव टिबी पाठकले पाँच लाख रुपैयाँको चेक अध्यक्ष प्रचण्डलाई हस्तान्तरण गरे ।