प्रेस चौतारीका अध्यक्षलाई कारबाही गर्नैपर्ने एकीकृत समाजवादी नेतृको माग

एकीकृत समाजवादीकी केन्द्रीय सदस्य रुक्मती जागरीले एमाले निकट प्रेस चौतारीका अध्यक्ष गणेश बस्नेतलाई कारबाही नगरिए कानुन हातमा लिने चेतावनी दिएकी छन् । पत्रकार सम्मेलन गरेर उनले बस्नेतलाई तत्काल पक्राउ गर्नुपर्ने अन्यथा द्वन्द्व सिर्जना हुनसक्ने उनको भनाई छ । 

‘मेरा पनि आफन्त छन्, दाइभाई छन्, यहाँ नसोचेको द्वन्द्व हुनसक्छ’, उनले भनिन्, ‘मलाई कानुन हातमा लिन बाध्य नपारियोस्, किनभने यो देश कानुनी राज्य हो, म कानुन मान्ने मान्छे हुँ ।’

जनता टाइम्सका सम्पादक समेत रहेका बस्नेतले केही समयअघि ‘एकीकृत समाजवादीकी नेतृको यो हर्कत’ भन्ने शीर्षकमा स्क्यान्डल जसरी समाचार प्रकाशित गरेका थिए । यद्यपि, त्यस सम्बन्धमा प्रेस काउन्सिलले उनलाई स्पष्टीकरण सोधिसकेको छ । साइबर ब्युरोले पनि उनलाई भदौ अन्तिम साता पक्राउ गर्न खोजेको थियो, तर परेनन् । 

रुक्मतीले भने पक्राउ पुर्जी जारी हँदा पनि बस्नेतलाई पक्राउ नगरिएको भन्दै आपत्ती जनाएकी छन् । बस्नेतले योजनाबद्ध रुपमा आफ्नो राजनीतिक र सामाजिक भविष्य खतम पार्न भ्रामक समाचार लेखेको उनको दावी छ । बस्नेतकै कारण आफूलाई बाँच्न गाह्रो भएको उनको दुःखेसो छ । 

सुनाइन्, ‘मैले मोबाइल अफ गरेर बस्नुपर्ने अवस्था आएको छ । मेरो आफन्त र परिवारलाई गाह्रो भएको छ । के त्यो पत्रकारको घरमा कुनै महिला छैनन् । मेरो ८८ किलो तौल थियो, अहिले घटेर ६० किलोमा झरेको छु तनावले । भर्खरै तौल जोखेर आएको ।’

रुक्मती जागरीले यसो भनेकी छन् :

गणेश बस्नेतले एकीकृत समाजवादीकी नेतृको यो हर्कत भनेर भ्रमित समाचार छापे । उनी सम्पादक रहेछन् । मेरो आपत्तिजनक भिडियो माधव नेपाललाई दिइएको छ भनेर लेखे । उनले त्यस्तै प्रकृतिका चार पाँचवटा भ्रमित समाचार लेखेका छन् । त्यो हर्कत गर्ने रुक्मती जागरी र उपमहासचिव हुन् भनेर भ्रमित समाचार छापे । प्रेस चौतारीका अध्यक्ष रहेछन् । 

त्यसपछि खप्तड टिभी, त्यसका सञ्चालक गणेश विक । उनले पनि त्यस्तै लेखे । उनीहरुले मिलेर योजना बनाइ बनाई मेरो व्यक्तिगत चरित्र हत्या गरे । भिडियो बनाएर मेरा आफन्तलाई खोजी खोजी पठाए । गाउँ समाजमा प्रचार प्रसार गरे । त्यसले मलाई यति गाह्रो बनायो कि मैले मोबाइल नै अफ गरेर बस्नुपर्यो । बसेको छु । 

त्यसपछि म प्रेस काउन्सिल, साइबर ब्युरो, महिला आयोग सबै ठाउँ धाएँ । 

महिला आयोगका सदस्यहरुले के भन्नुभयो थाहा छ ? दुःखलाग्दो कुरा हो यो । हामीले त महिला हिंसा र घरेलु हिंसा मात्रै हेर्छौ भनेर फर्काउनुभयो । प्रेस काउन्सिलले चाहीँ स्पष्टीकरण सोध्यो । तर पनि न्युज हटाएनन् उनीहरुले । 

साइबर ब्युरोमा जाँदा मैले आफूलाई प्रमाणित गर्न शारीरिक परीक्षणसमेत गराएको छु । १७ वटा बुँदामा स्पष्टीकरण बुझाएको छु । मैले साइबर ब्युरोमा सुनाएपछि फेसबुकमा सेयर गर्ने आशिष साउदविरुद्ध प्रक्राउ पुर्जी जारी भयो, तर उनी विदेशमा रहेछन् । तर समाचार लेख्ने गणेश बस्नेत विरुद्ध पक्राउ पुर्जी जारी भएन । अत्ति भएपछि म गृहमन्त्री कहाँ पुगे । उहाँलाई धन्यवाद दिन चाहन्छु, उहाँले महिलाको पीडा बुझ्नुहुँदा रहेछ । उहाँले डिआइजी साबलाई भन्दिनुभयो र पक्राउ पुर्जी जारी भयो । 

अझै शम्भु श्रेष्ठविरुद्ध प्रक्राउ पुर्जी जारी गर्न माग गरेको थिए । यो सबै उबाट सुरु भएको हो । जब कि उ आफै एकीकृत समाजवादी निकट पत्रकार संठगनको सदस्य हो । अहिले पक्राउ पुर्जी जारी भएर जुन नौटंकी प्रस्तुत भइराखेको छ, यो गलत कुरा हो । मलाई कानुन हातमा लिन बाध्य नपारियोस् । किनभने यो देश कानुनी राज्य हो । म कानुन मान्ने मान्छे हुँ । मेरो पनि घर परिवार छन्, आफन्त छन् । यहाँ द्वन्द्व हुनसक्छ । म जोडदार ढंगले माग गर्न चाहन्छु । पत्रकार महासंघले नौटंकी गरिरहेको छ । महिलामाथि हिंसा गर्ने अपराधी पत्रकार र राजनीतिक दलका षड्यन्त्रकारीहरुलाई कठघरामा उभ्याउन सहयोग गर्नुहोस् ।